Бугун “Қўқон-1912” жамоаси сафига иккинчи давра арафасида келиб қўшилган янги футболчиларни таништириш маросимини ўтказди.
Қўқондаги “Марказий” ўйингоҳида бўлиб ўтган тадбирда “Қўқон спирт” АЖ бошқарув Кенгаши раиси вазифасини бажарувчиси И. Абдуллаев , “Қўқон-1912” клуби раҳбарияти, мураббийлар штаби, футболчилар ва бир қатор мухлислар иштрок этишди.
Маросимни “Қўқон-1912” футбол клуби вице-президенти Бахтиёржон Толипов очди.
«Бу йилги мавсум жамоамиз учун жуда муваффақиятли ўтмоқда, деб сўз бошлади клуб раҳбари. – Биринчи даврани аъло даражада ўтказдик. Шунинг учун иккинчи давра арафасида таркибга икки нафар футболчи жалб этдик холос. Улар Қувондиқ Рўзиев ва Дониёр Ҳасанов.
Жамоамизнинг олдидаги мақсади - Осиё чемпионлар лигасига йўлланма олиш. Ўйлайманки, мавсум сўнггида ўз олдимизга қўйган вазифани бажара оламиз. Бунда албатта сиз мухлисларнинг кўмаги ҳам керак бўлади. “Қўқон-1912”нинг фидойи мухлислари бисёр эканлигини биламан. Сизлар жамоамизни яхши ёмон кунларида қўллаб-қувватлаб келдингиз. Бунинг учун барчангизга жамоа номидан миннатдорчилик изҳор этаман. Бугун иккинчи давра арафасида ўз сафимизга қўшиб олган янги футболчиларни кенг оммага таништирамиз» - деди у.
Шундан кейин янги ўйинчиларга либослар топширилди. Қувондиқ Рўзиев 70, Дониёр Ҳасанов 14-рақам остида майдонга тушиши ойдинлашди.
Маросим кўтаринки руҳда ўз якунига етди. Тадбир сўнгида ишқибозлар эртага бўладиган “Насаф”га қарши ўйиндан олдинги машғулотларини томоша қилишди.
