O‘zbekiston kubogi chorak final bosqichi doirasida "Lokomotiv" - "Buxoro" bahsidan keyin mehmonlar bosh murabbiyi Ulug‘bek Baqoyev stadion.uz veb-saytiga o‘z fikrlarini bilan o‘rtoqlashdi. Eslatib o‘tamiz, uchrashuvning asosiy vaqtida hisob ochilmadi, qo‘shimcha bo‘limlarda "temiryo‘lchilar" g‘alabani o‘z tomonlariga og‘dirishdi (3:0).

"Jismoniy jihatdan 120 daqiqa o‘ynashga kuchimiz yetmadi. Shunga qaramay, yigitlarga jonbozlik va shijoat uchun minnatdorchilik bildiraman. Qo‘shimcha bo‘limlarda bizga konsentrasiya yetishmadi. Shu bois, gollar o‘tkazib yubordik. "Lokomotiv"ni yarim finalga chiqqani bilan tabriklayman.

Qarshi hujumda o‘ynashni ko‘zlab, ikki hujumchi bilan harakat qilishni rejalashtirgandik. Shu bois, Ivor Vayser zaxirada qoldirilgandi. Ammo Azamat Allaniyozov o‘yinga kirishib keta olmadi.

Ivan Nagayev birinchi bo‘limda vaziyatdan foydalana olganida, o‘yin boshqacha kechishi mumkin edi. Futbol shunisi bilan qiziq. Kim gol ursa, o‘sha g‘alaba qozonadi. Raqib esa gol urdi va g‘olib chiqdi.

Umuman olganda, o‘yin borasida futbolchilarga e’tirozim yo‘q. Chempionatimiz peshqadamiga qarshi yetarlicha qarshilik ko‘rsatdik va yaxshi taassurot qoldirdik, deb o‘ylayman", — dedi Ulug‘bek Baqoyev.