Ўзбекистон кубоги чорак финал босқичи доирасида "Локомотив" - "Бухоро" баҳсидан кейин меҳмонлар бош мураббийи Улуғбек Бақоев stadion.uz веб-сайтига ўз фикрларини билан ўртоқлашди. Эслатиб ўтамиз, учрашувнинг асосий вақтида ҳисоб очилмади, қўшимча бўлимларда "темирйўлчилар" ғалабани ўз томонларига оғдиришди (3:0).

"Жисмоний жиҳатдан 120 дақиқа ўйнашга кучимиз етмади. Шунга қарамай, йигитларга жонбозлик ва шижоат учун миннатдорчилик билдираман. Қўшимча бўлимларда бизга концентрация етишмади. Шу боис, голлар ўтказиб юбордик. "Локомотив"ни ярим финалга чиққани билан табриклайман.

Қарши ҳужумда ўйнашни кўзлаб, икки ҳужумчи билан ҳаракат қилишни режалаштиргандик. Шу боис, Ивор Вайцер захирада қолдирилганди. Аммо Азамат Алланиёзов ўйинга киришиб кета олмади.

Иван Нагаев биринчи бўлимда вазиятдан фойдалана олганида, ўйин бошқача кечиши мумкин эди. Футбол шуниси билан қизиқ. Ким гол урса, ўша ғалаба қозонади. Рақиб эса гол урди ва ғолиб чиқди.

Умуман олганда, ўйин борасида футболчиларга эътирозим йўқ. Чемпионатимиз пешқадамига қарши етарлича қаршилик кўрсатдик ва яхши таассурот қолдирдик, деб ўйлайман", — деди Улуғбек Бақоев.