"Barselona" hujumchisi Neymarning otasi "ko‘k-anorranglilar" rahbariyati qaroridan g‘azabga tushdi.

2016 yilda kataloniyaliklar va Neymar o‘rtasida tuzilgan yangi shartnomaga ko‘ra, "Barsa" shu yilning 31 iyuliga qadar katta-Neymar hisob-raqamiga 26 million yevro mukofot puli o‘tkazib berishi kerak edi. Ammo jamoa rahbariyati bu pulni futbolchining otasiga to‘lamaslikka qaror qildi.

Neymarning otasi ta’kidlashicha, mukofot to‘lanishi uchun shartnomada o‘g‘lining klubda necha yil o‘ynashi kerakligi haqida band yo‘q edi. Shuningdek, o‘tgan yili tuzilgan shartnomadan "Barsa" yana bir yutuqqa erishdi. Aynan 2017 yilning iyul oyidan boshlab Neymarning badal puli 200 milliondan 222 million yevroga oshdi.

Neymarning yuristlari "Barselona"ning qaroridan hayron bo‘lishdi, ammo bu borada qanday chora ko‘rilishi haqida izoh berishmadi. Ushbu mojaroli ish sudgacha yetib borish ehtimoli yo‘q emas.