Agar "Real" klubi Chempionlar ligasining yangi mavsumida ham g‘alaba qozonsa, 1976 yildan buyon qatorasiga uch marta bu ishni uddalagan jamoaga aylanadi.
Shu holat yuz bergan taqdirda, "Real" eski qoidaga ko‘ra, Chempionlar ligasi kubogini abadiy egalik qilishga olgan bo‘lar edi.
Biroq, UYEFA 2008/09 mavsumda bu qoidaga o‘zgarish kiritdi. Unga ko‘ra, jamoalar Chempionlar ligasi kubogini necha marta qo‘lga kiritishidan qat’iy nazar, abadiy egalikka ololmaydi. G‘olib jamoaga faqat kubokning nusxasi topshiriladi.
Eslatib o‘tamiz, eski qoidaga binoan, Chempionlar ligasi / Yevropa chempionlari kubogida qatorasiga uch marta g‘olib chiqqan yoki umumiy hisobda besh marta uni qo‘lga kiritgan jamoaga kubok abadiy egalik qilish uchun topshirilar edi.
Bu qoida amal qilgan davrda 5ta klub shunday sharafga sazovor bo‘lgan:
"Real" - 1967 yilda, 5 marta g‘alaba qozongani uchun;
"Ayaks" - 1973 yilda, qatorasiga uch marta g‘alaba qozongani uchun;
"Bavariya" - 1976 yilda, qatorasiga uch marta g‘alaba qozongani uchun;
"Milan" - 1994 yilda, 5 marta g‘alaba qozongani uchun;
"Liverpul" - 2005 yilda, 5 marta g‘alaba qozongani uchun.
