Futbol bo‘yicha XXVI O‘zbekiston chempionati 16-tur uchrashuvini “Nasaf” o‘z maydonida “Qo‘qon-1912” jamoasiga qarshi o‘tkazadi.
Uchrashuv 6 avgust yakshanba kuni Qarshi shahridagi “Markaziy” stadionda soat 19:30da boshlanadi.
O‘zPFL 16-tur
“Nasaf” (Qarshi) – “Qo‘qon-1912” (Qo‘qon)
06.08.2017. “Markaziy” stadion. 19:30da
Bosh hakam: Vladislav Seytlin (Toshkent)
Yordamchi hakamlar: Aleksandr Sidorov (Toshkent), Doniyor Saylalov (Toshkent)
Zaxira hakami: D.Karimov (Toshkent)
Nazoratchi: Dmitriy Roman (Toshkent)
O‘zPFL vakili: Roman Chernikov.
Mazkur jamoalarning oliy ligadagi o‘zaro uchrashuvlari tarixiga nazar tashlasak, ular bungacha 15 marta to‘qnash kelishgan. Shundan 11ta uchrashuvda "Nasaf" g‘alaba qozongan. 4 uchrashuvda qo‘qonliklarning qo‘li baland kelgan. Eng qiziqarlisi jamoalar chempionatdagi o‘zaro uchrashuvlarda hanuzgacha durang natija qayd etishmagan.
To‘plar nisbati bo‘yicha ham ustunlik "Nasaf" tomonida 32-19.
Mazkur jamoalar bu yilgi chempionatning 1-tur uchrashuvini 4 mart kuni Qo‘qonda o‘tkazishgan. Uchrashuvda "Nasaf" 2:1 hisobida g‘alaba qozongan.
"Nasaf"ning o‘zaro uchrashuvlarda qozongan eng yirik g‘alabasi – 4:0. “Qo‘qon-1912”da bu ko‘rsatkich 3:0. Tarixda qolgan bu uchrashuvlar 2003 yili bo‘lib o‘tgan, “Nasaf” – “Temiryo‘lchi” 4:0 o‘yinida "Nasaf"ning to‘purari Zafar Xolmurodov xet-trik qayd etgan va Dilshod Mavlanov bir marta gol muallifi bo‘lgan.
Jamoalarning navbatdagi uchrashuvi 16-o‘yin sifatida tarix sahifasidan joy oladi. Bu uchrashuv, “Nasaf”ning oliy ligadagi 604-o‘yini hisoblanadi.
