Kecha, 3 avgust kuni Respublika Olimpiya zahiralari kollejida yosh chempionlar uchun ochilishi rejalashtirilayotgan “aqlli” basseyn loyihasining taqdimot marosimi o‘tkazildi.

“Beeline Uzbekistan” kompaniyasi Respublika Olimpiya zahiralari kollejini qo‘llab-quvvatladi va kollej hududida qurilishi rejalashtirilayotgan yangi sog‘lomlashtirish-suv majmuasiga sarmoya kiritishini ma’lum qildi. Kompaniya mazkur loyiha ob’ektini 2018 yil bahor mavsumigacha topshirishni rejalashtirmoqda.

Respublika Olimpiya zahiralari kolleji rahbari Jasur Akramov “Braziliyada o‘tkazilgan yozgi olimpiya o‘yinlari O‘zbekiston sportida nechog‘lik muvaffaqiyat qozona olishini isbotladi. Boks, dzyudo, erkin kurash va og‘ir atletika bo‘yicha terma jamoalarimiz mamlakatimizning ulkan salohiyatga ega ekanligini namoyish etdi. Ammo suzish bo‘yicha biz ortda qolyapmiz”, - dedi tadbirda.

Loyiha mualliflarining so‘zlariga ko‘ra, qurilma noyobligi bilan ajralib turadi. Chunki basseynning shunchaki suv konstruksiyasi bo‘libgina qolmay, o‘ziga xos o‘quv sinfi hamdir. Bu yerda leksiya va amaliy mashg‘ulotlar o‘tilishi mumkin.

Loyiha uchun Ispaniya va Daniyadan zamonaviy maxsus jihozlar keltirildi. Start olish tumbalari, ajratuvchi tasmalar, flagshtoklar, zinapoyalar, va boshqa jihozlar FINA xalqaro federasiyasi zamonaviy talablariga to‘liq javob beradi.

Basseynda suvni kompleks tozalash va tahlil qilish “aqlli” tizimi mavjud. Basseyn isitish jihozlari bilan ta’minlanganligi sabab yil davomida uzluksiz faoliyat ko‘rsatadi.