UYEFA Neymarning "Barselona"dan "PSJ" klubiga o‘tishi bilan bog‘liq jarayon ustidan tekshiruv boshladi.
Kataloniya klubining matbuot xizmati xabariga ko‘ra, Neymarning transferi uchun klub g‘aznasiga 222 mln yevro mablag‘ kelib tushdi. Ammo pul Parij klubi tomonidan to‘langani haqida ma’lumot ko‘rsatilmagandi. Shundan so‘ng, Neymar "PSJ" bilan 5 yillik shartnoma imzoladi.
Bu voqea yuzasidan "blaugranas" vakillari va Ispaniya professional ligasi (LFP) UYEFA tashkilotiga murojaat qilib, bu pullarning kelib chiqishi manbasini, shuningdek Fransiya klubi tomonidan moliyaviy feyr-pley qoidalariga amal qilinishini tekshirishni talab qildi.
Ta’kidlash joizki, "PSJ" klubi tomonidan moliyaviy feyr-pleyning buzilganligi bo‘yicha tekshiruv o‘tkazilganda, Neymarning transferi uchun qilingan xarajatlar 5 yilga - uning shartnomasi muddatiga taqsimlanadi.
Ya’ni "PSJ" Neymar uchun qilgan 500-600 mln yevro (transfer+maosh+bonuslar) miqdoridagi sarflarni birvarakayiga emas, balki uni 5 yilga taqsimoti natijasida kelib chiqadigan 100-120 mln yevro atrofidagi sarflarni asoslab berishi zarur bo‘ladi. Bu esa Parij klubining yillik daromadlariga mutanosibdir.
