УЕФА Неймарнинг "Барселона"дан "ПСЖ" клубига ўтиши билан боғлиқ жараён устидан текширув бошлади.
Каталония клубининг матбуот хизмати хабарига кўра, Неймарнинг трансфери учун клуб ғазнасига 222 млн евро маблағ келиб тушди. Аммо пул Париж клуби томонидан тўлангани ҳақида маълумот кўрсатилмаганди. Шундан сўнг, Неймар "ПСЖ" билан 5 йиллик шартнома имзолади.
Бу воқеа юзасидан "блаугранас" вакиллари ва Испания профессионал лигаси (LFP) УЕФА ташкилотига мурожаат қилиб, бу пулларнинг келиб чиқиши манбасини, шунингдек Франция клуби томонидан молиявий фэйр-плей қоидаларига амал қилинишини текширишни талаб қилди.
Таъкидлаш жоизки, "ПСЖ" клуби томонидан молиявий фэйр-плейнинг бузилганлиги бўйича текширув ўтказилганда, Неймарнинг трансфери учун қилинган харажатлар 5 йилга - унинг шартномаси муддатига тақсимланади.
Яъни "ПСЖ" Неймар учун қилган 500-600 млн евро (трансфер+маош+бонуслар) миқдоридаги сарфларни бирваракайига эмас, балки уни 5 йилга тақсимоти натижасида келиб чиқадиган 100-120 млн евро атрофидаги сарфларни асослаб бериши зарур бўлади. Бу эса Париж клубининг йиллик даромадларига мутаносибдир.
