O‘zbekiston terma jamoasi va hozirda Xitoyning “Shanxay SIPG” klubida to‘p surayotgan yarim himoyachi Odil Ahmedov Rossiyadagi faoliyati, xitoylik hamkasblari va Yevropa jamoalaridan bo‘lgan qiziqishlar xususida intervyu berdi.

– Xitoyliklar bilan do‘stlashish jarayoni oson kechdi.   Mahalliy futbolchilar jamoada legionerlar ko‘pligi sabab ularga ajratilgan oltita o‘rindan birida bo‘lishni istashadi.

Xitoyda futbolni chinakamiga sevishadi va doim maydonda asosiy bo‘lishni istashadi. Ishonch bilan ayta olamanki, 5 yildan keyin xitoylik futbolchilar professional darajaga ko‘tarilishadi.

“Anji va “Krasnodar” klublarining sobiq futbolchisi Odil Ahmedov o‘z vaqtida Yevropa klublaridan qiziqishlar bo‘lganini ham ta’kidladi.

– 2011-yil Angliyaning “Arsenal” klubiga o‘tishim mumkin edi. Albatta, bunday mashhur jamoada kimning o‘ynagisi kelmaydi deysiz?

Lekin o‘sha yil “Anji” bilan shartnoma imzolab bo‘lgandim va klub rahbariyati meni qo‘yib yuborishga rozi bo‘lmadi. Chunki “Anji”ni Yevropa darajasiga olib chiqish rejalashtirilgandi.

“Krasnodar” futbolchisi ekanligimda Fransiyaning “Nissa” jamoasi xizmatlarimga qiziqish bildirdi. Fransiyaliklar “Krasnodar” bilan Yevropa Ligasida o‘ynagandi, harakatlarimni balki shunda kuzatishgan.

Mavsum yakunlangandan so‘ng “Nissa” “Krasnodar”ga rasmiy taklif bilan chiqdi. Afsuski, “Krasnodar” bilan amalda shartnomam bor edi, shuningdek, transferim uchun taklif etilgan narx rossiyalik rahbarlarni qoniqtirmagan. Buni to‘g‘ri tushunishga harakat qildim.

Xitoy klubiga o‘tishim esa “Krasnodar” rahbarlaridan tashqari o‘zimni ham qoniqtirdi. “Krasnodar” meni “Shanxay SIPG”ga 5,5 million yevroga sotdi, “Nissa” esa transferimini sotib olish uchun 500 ming taklif etgandi.

Rossiya jamoalarida boshqa o‘ynamayman, “Shanxay SIPG”dagi yurishimni yakunlanganimdan keyin O‘zbekistonga qaytib, faoliyatimni davom ettiraman, - deya so‘zlarini yakunladi O‘zbekiston terma jamoasi sardori Ahmedov.

Ma’lumot o‘rnida, Ahmedov joriy mavsum “Shanxay SIPG” tarkibida 14 uchrashuvda maydonga tushib, bitta gol urgan.

Eslatib o‘tamiz, avvalroq Xitoy futbol assosiasiyasi Superligada ishtirok etayotgan jamoalarning legioner futbolchilardan bo‘lgan qarzlarini to‘lab berish uchun 15 avgustga qadar muxlat bergandi.

Qarzdorlar qatorida Odil Ahmedovning “Shanxay SIPG” va O‘zbekiston terma jamoasining yana bir a’zosi Anzur Ismoilov to‘p suradigan “Changchun Yatay” jamoasi ham bor.

Agar jamoalar belgilangan muddatga qadar qarzdorlikni to‘lab berishmasa, legioner futbolchilarning amaldagi shartnomasi muddatidan avval bekor qilinib, qarzdor klublarga jarim solinadi.