Eron terma jamoasi JCH-2018 saralashida Janubiy Koreya va Suriyaga qarshi kuchsizlangan tarkibda maydonga tushadi.
Mamlakat futbol federasiyasi (EFF) yetakchi futbolchilar Ehson Hojisafiy va Masud Shojayini milliy terma jamoa tarkibidan chetlatishga qaror qildi.
Gap shundaki, Gresiyaning "Panionios" klubi sharafini himoya qiluvchi bu futbolchilar Yevropa ligasi saralashida Isroilning "Makkabi" (Tel Aviv) klubiga qarshi o‘yinlarda maydonga tushgan. Ma’lumki, Eron Islom Respublikasi Isroil davlatini tan olmagan va ushbu mamlakat sharafini himoya qiluvchi sportchilar bilan bellashishni o‘z fuqarolariga taqiqlagan.
EFF futbolchilarni qaysi sanagacha chetlatganini e’lon qilmagan. Ammo, katta ehtimol bilan ular 31 avgust kuni Janubiy Koreya va 5 sentyabr kuni Suriya terma jamoasiga qarshi o‘yinlarda maydonga tushmaydi.
Eslatib o‘tamiz, aynan Janubiy Koreya va Suriya O‘zbekiston terma jamoasining JCH-2018 saralashidagi asosiy raqibi bo‘lib turibdi. Eron terma jamoasi esa JCH-2018 yo‘llanmasini muddatidan oldin qo‘lga kiritgan.
