Bugun Buxoro va Qarshi shahrining jamoalari Oliy liga 17-turida o‘zaro kuch sinashadi.

Bu uchrashuvga bo‘lgan qiziqish juda yuqori. Zero, ikkinchi davrani g‘alaba bilan boshlagan Nasaf bugun chiroyli o‘yini orqali ijobiy natija uchun maydonga tushadi, “Buxoro” jamoasi ham o‘z ishqibozlari ko‘z o‘ngida nimalarga qodir ekanligini isbot qilishga urinadi.

“Buxoro” va “Nasaf” jamoalari bungacha Buxoroda 19 marta o‘zaro kuch sinashgan “Buxoro” o‘z uyida 9 bor “Nasaf”ni taslim qilgan. 4ta uchrashuvda murosa ko‘chasi tanlangan. “Nasaf” 6 marta Buxorodan uch ochko bilan qaytgan. Oxirgi 4 bahsda “Nasaf” safardan uch ochko bilan qaytmoqda. Qiziqarli tomoni keyingi o‘tgan 3 uchrashuvda Nasaf bir xil 2:0 hisobida “Buxoro”ni mag‘lub etgan. Ya’ni, buxoroliklar “Nasaf” darvozasiga yo‘l topa olishmagan.

Bugungi uchrashuvda o‘zaro natijalar ham yangilanadi. Bahsdan keyin bu kimning foydasiga hal bo‘lganini bilib olamiz.

Xullas, futbol ishqibozlarini qiziqarli o‘yin kutib turibdi. Bugun Buxoro shahriga har doimgidek Qarshidan va viloyatdan ko‘plab Nasaf muxlislari tashrif buyurishadi. Ular bevosita stadionda turib Nasafga dalda bo‘lishadi.

Oliy liga 17-tur doirasidagi bugungi “Buxoro” – “Nasaf” uchrashuvi “Buxoro” sport majmuasida soat 19:00da boshlanadi.

O‘yinni FIFA hakami Valentin Kovalenko boshchiligidagi hakamlar boshqarib borishadi. Unga qanotlarda Mamur Saidqosimov va Aleksandr Snetkov yordam berishadi. Uchrashuvda zaxira hakami bo‘lib, Dmitriy Klepikov ishlaydi.