Бугун Бухоро ва Қарши шаҳрининг жамоалари Олий лига 17-турида ўзаро куч синашади.

Бу учрашувга бўлган қизиқиш жуда юқори. Зеро, иккинчи даврани ғалаба билан бошлаган Насаф бугун чиройли ўйини орқали ижобий натижа учун майдонга тушади, “Бухоро” жамоаси ҳам ўз ишқибозлари кўз ўнгида нималарга қодир эканлигини исбот қилишга уринади.

“Бухоро” ва “Насаф” жамоалари бунгача Бухорода 19 марта ўзаро куч синашган “Бухоро” ўз уйида 9 бор “Насаф”ни таслим қилган. 4та учрашувда муроса кўчаси танланган. “Насаф” 6 марта Бухородан уч очко билан қайтган. Охирги 4 баҳсда “Насаф” сафардан уч очко билан қайтмоқда. Қизиқарли томони кейинги ўтган 3 учрашувда Насаф бир хил 2:0 ҳисобида “Бухоро”ни мағлуб этган. Яъни, бухороликлар “Насаф” дарвозасига йўл топа олишмаган.

Бугунги учрашувда ўзаро натижалар ҳам янгиланади. Баҳсдан кейин бу кимнинг фойдасига ҳал бўлганини билиб оламиз.

Хуллас, футбол ишқибозларини қизиқарли ўйин кутиб турибди. Бугун Бухоро шаҳрига ҳар доимгидек Қаршидан ва вилоятдан кўплаб Насаф мухлислари ташриф буюришади. Улар бевосита стадионда туриб Насафга далда бўлишади.

Олий лига 17-тур доирасидаги бугунги “Бухоро” – “Насаф” учрашуви “Бухоро” спорт мажмуасида соат 19:00да бошланади.

Ўйинни ФИФА ҳаками Валентин Коваленко бошчилигидаги ҳакамлар бошқариб боришади. Унга қанотларда Мамур Саидқосимов ва Александр Снетков ёрдам беришади. Учрашувда захира ҳаками бўлиб, Дмитрий Клепиков ишлайди.