O‘zbekistonlik FIFA va OFK instruktori, FIFA Hakamlar qo‘mitasi a’zosi va hakamlar nazoratchisi Farhod Abdullayev Hindistonda bo‘lib o‘tadigan o‘smirlar o‘rtasidagi (U-17) Jahon chempionatida ishlash uchun Xalqaro futbol federasiyasi tomonidan taklif oldi.

Farhod Abdullayev mazkur musobaqada hakamlar nazoratchisi bo‘lib ishlaydi. O‘zbekistonlik mutaxassis bilan bir qatorda FIFA Hakamlar qo‘mitasi raisi, yaqin o‘tmishning eng mashhur hakamlardan biri Pyerluiji Kollina hamda AQSH, Paragvay, Ruanda, Chexiya va Solomon orollari kabi mamlakat vakillari U-17 Jahon chempionatida hakamlar ishiga baho beradi.

Ma’lumot uchun, o‘smirlar o‘rtasidagi (U-17) Jahon chempionati shu yilning 6–28 oktyabr kunlari Hindistonning 6 shahri – Kalkutta, Dehli, Kochchi, Navi-Mumbay, Guvaxati va Margao shaharlarida bo‘lib o‘tadi. Turnirda 6 konfederasiyadan jami 24 jamoa bosh sovrin uchun kurash olib boradi.