Xabaringiz bor, milliy terma jamoa o‘yinlari sabab endilikda Oliy Liga bahslarida qisqa muddatli tanaffus yuzaga keldi.
Shu paytga qadar milliy chempionatimizda jamoalar 18 tadan uchrashuv o‘tkazishga ulgurishdi. Quyida ayni paytda to‘purarlar bahsida kimlar yetakchilik qilayotgani xususida ma’lumot berib o‘tamiz.
Ta’kidlash joizki, “Lokomotiv” hujumchisi Marat Bikmayev mavsum boshidanoq to‘purarlar “poygasi”da yakkapeshqadamlikni qo‘lga olgandi. Marat ilk turlardanoq ketma-ket gollar urib, o‘z hisobidagi gollar sonini anchaga yetkazib olgandi.
Biroq futbolchi birinchi davra so‘nggiga kelib jarohat oldi va bir nechta uchrashuvni o‘tkazib yuborishga majbur bo‘ldi. Shunday bo‘lsa-da, milliy terma jamoamiz a’zosi ikkinchi davraning ilk o‘yinlaridanoq yana o‘zining to‘purarlik salohiyatini namoyish eta boshladi.
Hozirda Marat Bikmayevning kiritgan gollari soni 16 tani tashkil etmoqda. Shu o‘rinda qayd etish joizki, “Lokomotiv”ning penaltilar tepish borasida yetakchi “mutaxassisi” vazifasini qoyilmaqom tarzda uddalab kelayotgan Bikmayev 16 ta golning 5 tasini 11 metrli jarima zarbasida kiritgan.
To‘purarlar bahsida Bikmayevning eng yaqin ta’qibchisi – “Nasaf” hujumchisi Dragan Cheran sanaladi. U hozirga qadar 10 bor raqiblari darvozasini ishg‘ol etgan. “So‘g‘diyona” a’zosi Sanjar Rashidov esa 9 bor muvaffaqiyat qozongan.
Shuningdek, 3 nafar futbolchilar – Ilhom Yunusov, Zohid Abdullayev va Ivan Nagayev 7 martadan gol urishga erishishgan.
6 bor raqib darvozabonlarini hafa qilgan ijrochilar orasida “Lokomotiv”dan Murod Bobojonov ham bor. “Temiryo‘lchilar”dan Jaloliddin Masharipov 5 marta to‘p kiritgan.
Jamoamiz sardori Temur Kapadze, Ikrom Aliboyev hamda Sardor Mirzayev 3 martadan gol urishga muvaffaq bo‘lishgan.
“Loko” vakillaridan Islom To‘xtaxo‘jayev, Sadriddin Abdullayev, Diyor Turopov, Kaxi Maxaradze, Salamat Qutiboyev, Aziz Amonov va Oleg Zoteevlar 1 martadan muvaffaqiyat qozonishgan.
Umumiy hisobda “Lokomotiv” futbolchilari 43 marta raqiblari darvozalarini ishg‘ol etishgan. Bu borada ham “Lokomotiv” yakkapeshqadam bo‘lib turibdi. Jamoamizda to‘plar nisbati +31ni tashkil etmoqda.
Diqqatga sazovor jihati shundan iboratki, “Lokomotiv”dan tashqari faqatgina “Buxoro” 30 marta gol urgan. Boshqa hech bir jamoa hozircha 30lik dovondan oshgani yo‘q.
