“Lokomotiv” jamoasi safida ishonchli o‘yin namoyish etib kelayotgan Muhammad Gnontcha Kone Burkina Faso terma jamoasidan chaqiruv oldi.
O‘tgan yili O‘zbekiston terma jamoasi bilan o‘rtoqlik o‘yinida maydonga tushgan Burkina Faso terma jamoasi o‘z oldiga JCH-2018 yo‘llanmasidan biriga ega chiqishni maqsad qilgan. Ushbu yurt bosh jamoasi “Lokomotiv” safida Osiyo Chempionlar Ligasi hamda O‘zbekiston chempionati bellashuvlarida ishonchli o‘yin ko‘rsatib kelayotgan Muhammad Koneni navbatdagi uchrashuvlariga taklif etdi.
Aslida Kot-d’Ivuarda tavallud topgan 23 yoshli himoyachi ayni paytda Burkina Faso pasportiga ham ega. Shu sababli burkinaliklar ustozi Koneni oldindagi ikki uchrashuvga chaqirishni lozim topdi.
Burkina Faso terma jamoasi mundial saralashining D guruhida ishtirok etmoqda va 4 ochko bilan jadvalda birinchi pog‘onada ketmoqda. Burkinaliklar 2 sentyabr kuni Senegal maydoniga safar uyushtirishsa, 5 sentyabrda o‘z uylarida senegalliklarni qabul qilishadi. Ushbu uchrashuvlarda Muhammad Kone ham ishtirok etish uchun chaqirildi. Burkina Faso o‘rin olgan guruhda yana Janubiy Afrika Respublikasi terma jamoasi hamda Kabo Verde termalari ham bor.
