«Barselona» klubi sobiq futbolchisi Neymar "ko‘k-anorranglilar"ning bayonotidan hayron qoldi va klubga nisbatan sudga murojaat qilmoqchi. Bu haqda futbolchining advokatlari xabar tarqatishdi.

«Neymar va advokatlar "Barselona"ning mahalliy sud orqali futbolchidan pul undirish borasidagi harakatidan xabardor. Rasmiy ogohlantirish olganimizdan keyin va barcha narsalarni o‘rganib chiqqanimizdan so‘ng biz o‘rnatilgan tartibda kerakli ishlarni amalga oshiramiz. 2016 yilda tuzilgan shartnoma orqali olingan mukofot puli borasida shuni ta’kidlaymizki, o‘yinchi klubga nisbatan sudga murojaat qilish borasida hujjatlarni tayyorlash istagini bildirdi», — deya bayonot berdi Neymarning advokatlari.

"Barselona" klubi o‘z transferini 222 mln. yevroga sotib olib, "PSJ"ga o‘tib ketgan Neymarni shartnoma bandlarini buzganlikda aybladi va futbolchidan 8,5 mln. yevro miqdorida pul undirishni istamoqda. Braziliyalik futbolchi 2016 yilning kuzida jamoa bilan yangi shartnomaga imzo chekkanida 8,5 mln. yevro miqdoridagi pulni mukofot sifatida olgandi.