Futzal bo‘yicha O‘zbekiston milliy terma jamoasi 24-31 avgust kunlari Rossiyaning Yekaterinburg shahrida yig‘in o‘tkazadi.
Bahodir Ahmedov boshchiligidagi terma jamoamiz bugun tongda Rossiyaga uchib ketishdi. Kecha jamoa safar oldidan so‘nggi mashg‘ulotini o‘tkazdi. Unda darvozabon Akmal Xazratqulov yengil shamollagani bois ishtirok etmadi, qolganlar to‘liq shug‘ullanishdi. Bundan tashqari, yoshlar terma jamoamiz kiperlari Sunnatjon Anvarov va Mirislom Miraliyevlar ham mashg‘ulotda ishtirok etishdi. Safaroldi mashg‘ulot bo‘lgani sabab murabbiylar og‘ir mashqlardan foydalanishmadi, asosan o‘yin payti yuzaga keladigan turli vaziyatlar, o‘ynovchi darvozabon bilan harakat qilish va to‘p bilan ishlashga e’tibor qaratildi.
O‘zbekiston terma jamoasining Rossiyaga boradigan tarkibi haqida oldinroq xabar bergan edik. Terma jamoamiz Yekaterinburgda Rossiyaning "Viz-Sinara" va "Zik-Urfu" jamoalariga qarshi ikkitadan o‘rtoqlik o‘yini o‘tkazadi.
Bo‘lajak yig‘in O‘zbekiston futzal termasi uchun Turkmaniston poytaxti Ashxobod shahrida yopiq inshootlarda bo‘lib o‘tadigan 2017 yilgi Osiyo o‘yinlari va futzal bo‘yicha 2018 yilgi Osiyo chempionati saralash bahslariga tayyorgarlik vazifasini o‘taydi.
Ma’lumot uchun, Ashxoboddagi Osiyo o‘yinlari shu yilning 16–26 sentyabr kunlari o‘tkaziladi.
