«Barselona» bosh murabbiyi Ernesto Valverde Usmon Dembelening transferi borasida o‘z fikrlarini bildirib o‘tdi.

«Dembele – tarkib borasida imkoniyatlarimizni oshiradigan futbolchi. U bizga kerak edi. U har ikkala qanotda, markazda va insayd pozisiyasida o‘ynay oladi. Dembele — texnik jihatdan kuchli.

Transfer bozori qanday ishlayotganidan xabarimiz bor. So‘nggi kunlarda ko‘p ajiotaj ko‘tarilmoqda. Nazarimda, barcha jamoalar o‘z tarixidagi eng qimmat futbolchilarni sotib olishga qaror qilgan ko‘rinadi.

Yaqingacha Dembele haqida hech kim hech narsa bilmasdi, ammo u ajoyib futbolchi. «Barselona» uni hammadan ham ko‘ra ko‘proq qo‘lga kiritishni istadi.

Biz chempionlar ligasida qiyin guruhga tushdik. «Yuventus» – musobaqaning o‘tgan yilgi finalchisi. Bu jamoa bizni chorak finaldan chiqarib yuborgandi. Ular hujumda ham, himoyada ham birdek yaxshi o‘ynay olishadi.

Duglas Pereyra, Arda Turon va Tomas Vermalen jamoani tark etishlari mumkin. Hozirda jamoada 5 nafar markaziy himoyachi bor. Shu bois, Marlon boshqa klubga o‘tishi mumkin», – dedi Valverde.