O‘zbekiston milliy terma jamoasi himoyachisi Anzur Ismoilov JCH saralashi doirasida Xitoyga qarshi kechadigan o‘yin oldidan intervyu berdi.
- Anzur, avvalo jamoadagi ichki muhit haqida bilmoqchi edik. Kayfiyat qanday?
- Juda yaxshi. Uzoq yo‘lga uchib kelish qiyin bo‘ldi, lekin dam olib, ancha o‘zimizga kelib oldik. Birinchi mashg‘ulot ham yaxshi o‘tdi. Hammasi joyida.
- Xitoy chempionati haqida juda yaxshi tasavvurga egasiz va terma jamoasini ham bilasiz. Nima deb o‘ylaysiz, bu raqibni yengsa bo‘ladimi va nimaning hisobiga yengish mumkin?
- Xitoyni yutsa bo‘ladi, albatta. Xitoy chempionatini ham, terma jamoasini ham yaxshi bilaman. Futbolchilarini yaxshi taniyman, ancha kuchli o‘yinchilar. Ammo legionersiz ularga baribir qiyin bo‘ladi. Xitoylik futbolchilar legionerlar bilan o‘ynashga o‘rganib qolishgan. Klublarida asosan legionerlar orqali o‘yinlarni hal qilishadi. Terma jamoada ularga legionerlar yordam bera olmaydi, bu bizning foydamizga ishlashi kerak.
- Xitoy terma jamoasining asosiy kamchiligi shundami? Biz g‘alaba uchun qanday uslubda o‘ynashimiz lozim?
- Pressing qilsak yaxshi bo‘ladi, deb o‘ylayman. Tajovuzkor, agressiv o‘yin ko‘rsatsak, g‘alaba qozona olamiz.
- Xitoy terma jamoasi tarkibida yetakchi futbolchilar bormi? Ular haqida nima deya olasiz?
- Bor, albatta. Juda ham tezkor yarim himoyachi bor - Gao Li. Yaxshi futbolchilar ko‘p, ularga o‘yin bermasak, g‘alaba biz tomonda bo‘ladi.
- Xitoy terma jamoasi bosh murabbiyi haqida nima deya olasiz?
- Endi Lippini hamma yaxshi biladi. Lekin taktika masalasida qanday yo‘l tutishini aniq ayta olmayman, har holda yangi murabbiy. Faqat bir gapni aytishim mumkin, Lippi "Guanchjou"da ishlagan vaqtda yaxshi bilgan futbolchilarni terma jamoaga olgan. Ko‘proq o‘zi yaxshi bilgan o‘yinchilar bilan ishlashni istayapti.
- Anzur, nima deb o‘ylaysiz, ertaga bizga stadiondagi muxlislar halal bera oladimi? Har holda minglab muxlislar kelishi kutilyapti, stadionda muhit dahshatli bo‘ladi...
- Yo‘q, muxlislar bizga halal beradi, deb o‘ylamayman. Terma jamoadagi barcha futbolchilar professional va bunday atmosferaga o‘rganib qolgan. Bizning boshqa ilojimiz ham yo‘q, faqat g‘alaba qozonish kerak. Raqib muxlislari ko‘p bo‘ladimi yoki kam, baribir yutish shart.
