Xitoy termasiga qarshi kechadigan muhim o‘yin oldidan ayrim jihatlarni sarhisob qilib olish ziyon qilmaydi. Xususan, futbolchilarimizdagi o‘yin amaliyoti qanday ekanligini.
Xo‘sh, milliy jamoa tarkibiga kiritilib, Chin yurtida maydonga tushishga hozirlik ko‘rayotganlar joriy mavsum o‘z klublarida qanday ko‘rsatkichlar qayd etishmoqda?
Samvel Babayan Xitoyga 24 nafar futbolchi bilan yo‘l oldi. Ammo o‘yin paytida faqatgina 23 nafar futbolchi ro‘yxatga kiritiladi. Shunday ekan, Chin o‘lkasiga ketgan o‘yinchilardan biri «zayavka»dan tushib qoladi.
Aytish joizki, safarga ketgan futbolchilarning 11 nafari legionerlardir. Shulardan Sardor Rashidov, Aziz Haydarov va Temurxo‘ja Abduxoliqovlar BAA va Qatar chempionatlari start olmagani bois, hozircha o‘yin amaliyotiga ega emaslar. To‘g‘ri, ular o‘z jamoalarining o‘rtoqlik uchrashuvlarida maydonga tushib, hattoki, ayrimlari gol urishga ham erishdilar. Xioy superligasida faoliyat olib borayotgan Yegor Krimesga esa «Pekin Guoan» murabbiylari unchalik ishonch bildirishmayapti. Chunki u hozirgacha faqat ikkita o‘yinda maydonga tushdi, xolos. Shunga qaramay, Krimes terma jamoaga hamon chaqirilamoqda.
Odil Ahmedov, Anzur Ismoilov va Fozil Musayevlar esa o‘z jamoalari safida muntazam ravishda maydonga tushishmoqda. Shu o‘rinda aytish joizki, Ahmedov, Ismoilov va Krimeslarning Xitoy chempionatida to‘p surishlari bo‘lajak uchrashuvda termamizga qo‘l kelsa, ajabmas.
Legionerlarimizdan yana bir Aleksandr Geynrix ham «Ordabasi» tarkibida o‘tgan yildagidek mazmunli o‘yin namoyish qila olmayapti. Jarohatidan yangi forig‘ bo‘lgan Vitaliy Denisov esa «Lokomotiv» (Moskva)ning joriy mavsumdagi bitta o‘yinida zaxiradan maydonga tushdi. «Rostov» a’zosiga aylangan Eldor Shomurodov deyarli barcha uchrashuvlarda ishtirok etmoqda. Biroq uni asosan zaxiradan tushirishadi. Eron chempionati endi boshlangani bois, Server Jeparov ham unchalik ko‘p o‘yin o‘tkazmagan. Ammo muhimi, u «Istiqlol» murabbiylari ishonchini oqlab, muxlislarga xush yoqadigan futbol namoyish qilmoqda.
Milliy chempionatimizda faoliyat olib borayotganlar haqida gapiradigan bo‘lsak, Samvel Vyacheslavovichning ayni payt eng kuchli bo‘lgan o‘yinchilarni tanlagani guvohiga aylanamiz. Umid qilamizki, bugun o‘tkaziladigan bahsda futbolchilarimiz bor kuchlarini ishga solib, yurtimizga uch ochko bilan qaytishadi.
Futbolchi O‘yin Vaqt Gol «Sariq» «Qizil»
Darvozabonlar:
Aleksandr Lobanov («Paxtakor») 16 1440 -19 - 1
Ignatiy Nesterov («Lokomotiv» Toshkent) 15 1350 -10 - -
Nikita Ribkin («Qo‘qon-1912») 5 405 -9 1 -
Himoyachilar:
Farrux Sayfiyev («Nasaf») 17 1485 1 3 -
Vitaliy Denisov («Lokomotiv» Moskva, Rossiya) 1 44 - - -
Anzur Ismoilov («Chanchun Yatay», Xitoy) 18 1574 1 1 1
Sherzod A’zamov («Paxtakor») 17 1463 - - -
Yegor Krimes («Pekin Guoan», Xitoy) 2 148 - 1 -
Akmal Shorahmedov («Nasaf») 18 1620 1 4 -
Islom To‘xtaxo‘jayev («Lokomotiv») 11 990 1 2 -
Yarim himoyachilar:
Server Jeparov («Istiqlol» Tehron, Eron) 5 - 1 - -
Jaloliddin Masharipov («Lokomotiv») 15 1144 5 5 -
Sardor Mirzayev («Lokomotiv») 17 1349 3 1 -
Eldor Shomurodov («Rostov», Rossiya) 5 89 - - -
Odil Ahmedov («Shanxay SIPG», Xitoy) 16 1421 2 3 -
Fozil Musayev («Jubilo Ivata», Yaponiya) 17 1477 2 - 1
Aziz Haydarov («Ajman», BAA) - - - - -
Otabek Shukurov («Bunyodkor») 17 1498 2 4 -
Jamshid Iskanderov («Paxtakor») 14 1035 2 1 -
Sardor Rashidov («Al-Jazira», BAA) - - - - -
Marat Bikmayev («Lokomotiv») 14 1079 16 3 -
Hujumchilar:
Temurxo‘ja Abduxoliqov («Al-Sayliya», Qatar) - - - - -
Igor Sergeev («Paxtakor») 14 1055 6 - -
Aleksandr Geynrix («Ordabasi», Qozog‘iston) 12 267 - - -
