"Barselona" prezidentligiga sobiq nomzod Augusti Benedito klub rahbari Jozep Bartomeu va uning yordamchilariga ishonchsizlik votumi e’lon qilmoqchi.

Sport.es xabariga ko‘ra, Benedito "blaugranas" ofisiga kelib, zarur hujjatlarni olgan. Endi u klub a’zolarining 16 mingta imzosini to‘plashi kerak.

"Bartomeu iste’foga chiqishi kerak. U nazoratni yo‘qotdi. Hozir klubda boshqaruvning jiddiy inqirozi yuz bermoqda. O‘ylashimcha, tashabbusimni klubning 40-50 ming a’zosi qo‘llab-quvvatlashga tayyor" - dedi Benedito.