O‘zbekiston terma jamoasi safida Hamburgdagi Jahon Chempionatida ishtirok etib, kumush medalni qo‘lga kiritgan bokschi Hasanboy Do‘stmatov o‘zi va jamoadoshlarini qo‘llab-quvvatlagan muxlislardan minnatdor ekani haqida aytdi.
"Qo‘llab-quvvatlaganinglar uchun katta rahmat! Biz shu bilan to‘xtab qolmaymiz va ishlashda davom etamiz. Sizlarni hali ko‘p xursand qilamiz. Yana bir bor rahmat! O‘zbekistonda tug‘ilganimdan va sizdek ahil xalqimiz borligidan faxrlanaman!" - dedi Hasanboy Do‘stmatov.
Instagram sahifasida chiqish qilgan Hasanboy mazkur so‘zlariga ilova qilib xitoylik mashhur jang san’ati ustasi, kinoaktyor Bryus Lining rasmini qo‘ygan. Rasmga quyidagi so‘zlar yozilgan: «Hayotda eng muhimi harakatda davom etish va o‘z maqsadi sari olg‘a qadam bosishdir».
