Futbol mutaxassisi Alisher Nikimbayevning so‘zlariga ko‘ra, OFK JCH—2018 saralashi doirasidagi Eron — Suriya (2:2) uchrashuvi yuzasidan tekshiruv boshlagani haqidagi gap-so‘zlar — uydirma.
«OFK saytida bunday yangilik yo‘q. U yerda ‘siyosiy betaraflik tamoyili’ buzilgani yuzasidan tekshiruv olib borilayotgani haqida xabar bor. Vaziyatdan boxabar har qanday inson bu gaplar Qatar va boshqa arab mamlakatlari o‘rtasidagi diplomatik mojaroga aloqador ekanini tushunib turibdi. Aqlliroq bo‘ling, fitnalarga uchmang», — deb yozgan Alisher Nikimbayev.
Nikimbayevning alohida ta’kidlashicha, OFK axborotida «kelishilgan o‘yinlar» haqida hech nima deyilmagan. «Shundan xulosa qilishi mumkinki — bu Qatarning beIN Sports telekanali bilan bog‘liq muammolar masalasidir», — deb yozadi Nikimbayev.
Ma’lum bo‘lishicha, Saudiya Arabistoni va Yaponiya terma jamoalari o‘rtasidagi JCH—2018 saralash uchrashuviga Qatarning beIN Sports telekanali ijodkorlari jamoasi qo‘yilmagan. Mazkur telekanal esa bunday o‘yinlarni translyasiya qilish bo‘yicha eksklyuziv huquqlarga ega edi.
Avvalroq OFK saytida «siyosiy betaraflik tamoyili» buzilgani munosabati bilan, 5 sentyabr kuni o‘tkazilgan JCH—2018 saralash uchrashuvlari yuzasidan tekshiruv boshlangani haqida xabar berilgan edi.
