Iqtisod fanlari nomzodi, «Huquqiy tashabbuslarni qo‘llab-quvvatlash xalqaro fondi» vise-prezidenti Alisher Aminov Toshkentga tashrif buyurib, O‘zbekiston futbolidagi muammolar va bevosita mamlakat futbol federasiyasidagi kamchiliklar to‘g‘risida prezentasiya qildi.
Aminovning qayd etishicha, O‘FF prezidentligi uchun saylovlar shaffof ruhda o‘tmaydi. Aslida esa bunday saylovlar oldidan debatlar o‘tkazilishi, raqobat bo‘lishi, prezidentlikka nomzodlarning ish dasturi muhokama qilinishi kerak. Ammo O‘FFda bunday emas.
Futbolning asosiy bo‘g‘inlarini muammo nimada ekanini aniq tushunib yetmaydigan kishilar boshqarishi prezentasiyada qayd etilgan. Shundan kelib chiqib, O‘FF jamoatchilik va mass-media uchun yopiqligicha qolmoqda.
Futboldagi natijalarning yildan yilga yomonlashib borayotgani tizimli ahamiyatga ega. Chunki O‘FF futbolning asosiy sub’ektlarini inkor qiladi, murabbiylar, futbolchilar, hakamlar yirik qarorlar qabul qilishda asosiy rolni o‘ynamaydi. O‘FF prezidentlarining har safar davlat amaldorlari orasidan tanlab olinishi ham to‘g‘ri yo‘l emas.
Bunga qadar O‘FF prezidenti sifatida ishlagan Atxambek Fozilbekov, Abdulhoshim Mutalov, Zokir Almatov va ayni paytdagi prezident Mirabror Usmonovlarning barchasi davlat amaldorlari hisoblanadi, deyilgan prezentasiyada.
O‘FF saylovi yana 5 kundan keyin — 12 sentyabr kuni bo‘lib o‘tadi. Biroq jamoatchilik nomzodlar kim ekani borasida umuman ma’lumotga ega emas.
