«Sport» telekanali orqali efirga uzatilayotgan «Gol» ko‘rsatuvi mehmoni Odil Ahmedov kerak bo‘lsa O‘zbekiston milliy terma jamoasidan ketishga ham tayyorligini ma’lum qildi.

O‘zining tan olib aytishicha, JCH—2018 uning uchun so‘nggi imkoniyat edi. Keyingisida Ahmedov 35 yoshga yaqinlashib qolgan bo‘ladi. Shundan kelib chiqib, Xitoyga qarshi o‘yindan keyin terma sardori futbolni yig‘ishtirib qo‘yish kerakligi haqida achchiq fikrlar bildirib o‘tgandi.

"O‘shanda mag‘lubiyat juda alam qildi, jahl ustida gapirdim. So‘zlarim futbolga tegishli insonlarga yetib borsin, deb gapirdim. Masalan, futbolchilar, murabbiylar va shu sohada kim ishlasa — o‘shalar.

O‘yindan so‘ng yigitlar bilan suhbatlashib, hammasi o‘z qo‘limizda ekanligini tushuntirishga harakat qildim. Bu intervyudan so‘ng menga yozganlar bo‘ldi. Men aytganimdan pushaymon bo‘lganim yo‘q. O‘zbek futboli rivojlanishini istayman.

Ushbu Jahon Chempionati men uchun so‘nggi imkoniyat edi. Keyingi saralashda yoshim 34—35 ga yetib qoladi. Terma jamoaga yangi qon kerak. 34—35 yoshda shunchaki familiyam emas, hozir terma jamoaga qo‘shilib, 2—3 yildan so‘ng yaxshi formaga kirib olgan futbolchi to‘p tepishini istayman. Terma jamoaga yangi yosh futbolchilarni olib kelish kerak bo‘lsa, ketishga tayyorman.

To‘g‘risi, so‘nggi ikki uchrashuvdan so‘ng qanday holatga tushganimni o‘zim bilaman. Shu sababli, har sohada o‘zining ustalari ishlashi kerak deb o‘ylayman. Bergan intervyuimda aynan shu haqda aytmoqchi edim" - dedi Odil Ahmedov.