«Спорт» телеканали орқали эфирга узатилаётган «Гол» кўрсатуви меҳмони Одил Аҳмедов керак бўлса Ўзбекистон миллий терма жамоасидан кетишга ҳам тайёрлигини маълум қилди.
Ўзининг тан олиб айтишича, ЖЧ—2018 унинг учун сўнгги имконият эди. Кейингисида Аҳмедов 35 ёшга яқинлашиб қолган бўлади. Шундан келиб чиқиб, Хитойга қарши ўйиндан кейин терма сардори футболни йиғиштириб қўйиш кераклиги ҳақида аччиқ фикрлар билдириб ўтганди.
"Ўшанда мағлубият жуда алам қилди, жаҳл устида гапирдим. Сўзларим футболга тегишли инсонларга етиб борсин, деб гапирдим. Масалан, футболчилар, мураббийлар ва шу соҳада ким ишласа — ўшалар.
Ўйиндан сўнг йигитлар билан суҳбатлашиб, ҳаммаси ўз қўлимизда эканлигини тушунтиришга ҳаракат қилдим. Бу интервьюдан сўнг менга ёзганлар бўлди. Мен айтганимдан пушаймон бўлганим йўқ. Ўзбек футболи ривожланишини истайман.
Ушбу Жаҳон Чемпионати мен учун сўнгги имконият эди. Кейинги саралашда ёшим 34—35 га етиб қолади. Терма жамоага янги қон керак. 34—35 ёшда шунчаки фамилиям эмас, ҳозир терма жамоага қўшилиб, 2—3 йилдан сўнг яхши формага кириб олган футболчи тўп тепишини истайман. Терма жамоага янги ёш футболчиларни олиб келиш керак бўлса, кетишга тайёрман.
Тўғриси, сўнгги икки учрашувдан сўнг қандай ҳолатга тушганимни ўзим биламан. Шу сабабли, ҳар соҳада ўзининг усталари ишлаши керак деб ўйлайман. Берган интервьюимда айнан шу ҳақда айтмоқчи эдим" - деди Одил Аҳмедов.
