Ma’lumki, shu kunlarda poytaxtimizda suv sporti turlari bo‘yicha yosh toifalar o‘rtasida IX Osiyo chempionati bahslari o‘tkazilmoqda. 

E’tiborlisi, uch kunlik musobaqalarning yakuniga ko‘ra, mamlakatimiz sportchilari jami 11 ta oltin, 11 ta kumush va 9 ta bronza medaliga sazovor bo‘ldi.

Uchinchi kun bo‘lib o‘tgan musobaqalarda mamlakatimiz sportchilari 4 ta oltin, 1 ta kumush va 3 ta bronza medallarini terma jamoamiz hisobiga yozib qo‘ydi.

Sportchilarimiz tomonidan qo‘lga kiritilgan 4 ta oltin medalning uchtasi estafeta bahslarida erishildi.

Jumladan, 4 bor 100 metr masofaga kompleks usulda o‘tkazilgan estafeta bahslarida o‘smirlar o‘rtasidagi musobaqada ham, qizlar o‘rtasidagi bellashuvlarda ham hamyurtlarimiz birinchi o‘rinni egallashdi.

O‘smirlar o‘rtasidagi bahslarda Vladislav Mustafin, Xurshid Tursunov, Artem Kozlyuk va Danil Bukindan iborat kvartet birinchi bo‘lib marra chizig‘iga yetib kelgan bo‘lsa, Maftunabonu To‘xtasinova, Alyona Tomina, Shohsanam Toshpo‘latova hamda Alyona Vasilyevadan iborat jamoamizga ham teng keladigan raqib bo‘lmadi.

Hamyurtlarimiz, shuningdek, 4 bor 100 metr masofaga erkin usulda suzish bo‘yicha mikst bahslarida ham shohsupaning eng yuqori pog‘onasidan o‘rin egallashdi. Ushbu musobaqada Vatanimiz sharafini himoya qilgan Alyona Tomina, Maftunabonu To‘xtasinova, Danil Tulupov va Aleksey Tarasenkodan iboart to‘rtlik oltin medal sohibi bo‘ldi.

To‘rtinchi oltin medalga 50 metr masofaga erkin usulda suzishda Xurshid Tursunov sazovor bo‘ldi. Kecha bo‘lib o‘tgan bahslarda, shuningdek, Fotima Amilova 200 metrga brass usulida suzishda kumush, 50 metrga erkin usulda suzishda Aleksey Tarasenko, 100 metr masofaga erkin usulda suzishda Alyona Tomina hamda 50 metrga brass usulida suzishda Aleksey Sidorchuk bronza medallari bilan taqdirlanishdi.

Bugun suv sporti turlari bo‘yicha yosh toifalar o‘rtasida o‘tkazilayotgan IX Osiyo chempionatida navbatdagi g‘olib va sovrindorlar nomi ma’lum bo‘ladi. Musobaqalar davom etmoqda.