Bugun, 20 sentyabr kuni Ispaniya chempionatining 5-turidan o‘rin olgan “Barselona”–“Eybar” uchrashuvida misli ko‘rilmagan natijalar ro‘y berdi.
Ya’ni o‘yin maydon egalarining 6:1 hisobidagi yirik g‘alabasi bilan yakunlangan bo‘lsa, argentinalik hujumchi Lionel Messi pokerga erishib, o‘zining “Barselona” futbolchisi sifatida “Kamp Nou” stadionidagi 300-golini (barcha musobaqalarni qo‘shib hisoblaganda) urdi.
Leo, bundan tashqari, faoliyatidagi 39-xet-trikini ham aynan “Eybar”ga qarshi uchrashuvda nishonladi.
Shu bilan birga tajribali hujumchi mehmonlar darvozasiga to‘rtta gol (poker) urishning uddasidan chiqdi.
Eslatib o‘tamiz, hujumchi so‘nggi marta 2013 yil shunday ko‘rsatkichni qayd etgandi.
Asosiysi, Messi afsonaviy angliyalik futbolchi Jimmi Graves (Tottenxem) ning rekordini takrorladi. Graves faoliyatining gullagan vaqtida 357 ta gol urish erishgandi.
Agarda argentinalik futbolchi yana 9 ta gol ursa, Gerd Myuller (Bavariya) ning (365 gol) natijasidan o‘tib ketadi va futbol tarixidagi mutloq rekordchiga aylanib oladi.
Messi, shuningdek, “Barselona”ning Ispaniya chempionatida mavsum boshidan kiritgan 16 ta golining 8 tasini o‘z nomiga yozib qo‘ygan.
Jamoaga yangi kelib qo‘shilgan braziliyalik Paulinyo ketma-ket ikki uchrashuvda maydonga tushib, ikkita gol urishning uddasidan chiqdi. Kataloniyaliklarning yana bir goliga Denis Suares mualliflik qildi.
Shu tariqa, “Barselona” mavsumdagi 5 ta uchrashuvning barchasida g‘alaba qozonib, 15 ochko bilan Ispaniya La-Ligasida musobaqaning yagona peshqadamiga aylanib oldi.
Muxlislar e’tiboriga Lionel Messini bilan bog‘liq ayrim ma’lumotlarni eslatib o‘tishni lozim topdik.
Masalan, “Our–Mine” xakerlik guruhi bir daqiqa ichida “Barselona” jamoasining yetakchi futbolchisi Lionel Messini “Real” futbolchisiga “aylantirib” qo‘yishgan edi.
Bundan tashqari, Barselona” hujumchisi Lionel Messi YECHL 1-turida “Yuventus” bilan o‘yinda (3:0) ikki golga mualliflik qilgani haqida xabar bergan edik.
Shuningdek, muxlislar Lionel Messini o‘z vatanini sevmasligini aytishgani haqida maqola e’lon qilingandi.
Barselona, “Kamp Nou” stadioni.
“Barselona”–“Eybar” — 6:1 (2:0)
Gollar: Messi 20 (pen), Paulinyo 38, Suares 53, Messi 59, Messi 62, Messi 87 — Enrix 57
“Barselona”: Ter Shtegen, Pike, Maskerano, Din, Semedu, Buskets (Rakitich 65), Inyesta (Roberto 63), Paulinyo, Messi, Deulofeu (Vidal 75), Suares.
“Eybar”: Dmitrovich, Galvez, Oliveyra, Xunka, Arbilya, Eskalante, Dani (Rivera 77), Xordan, Enrix (SHarles 72), Inui, Kapa (Penya 65).
Ogohlantirishlar: Kapa 10, Galvez 80.
Akmalxon Eshonxonov
