“Sho‘rtan” – “Navbahor” jamoalari o‘rtasidagi uchrashuv yakuniga yetgach o‘tkazilgan matbuot anjumanining ikkinchi qismida, jurnalistlarning savollariga “Sho‘rtan” bosh murabbiyi vazifasini bajaruvchi Gennadiy Gennadyevich Kochnev javob berdi: 

Birinchi bo‘limga to‘xtaladigan bo‘lsam, shogirdlarim juda yaxshi harakat qilishdi. Birinchi bo‘lib darvozamizdan gol o‘tkazib yuborganimizga qaramay, vaziyatni o‘nglay oldik. Natijada uchta gol kiritib, ikkita gol farqi bilan oldinga chiqib oldik.

Ochig‘ini aytganda, biz yaxshi ustunlikka ega edik. Ikkinchi bo‘limda, avvaliga ikkinchi keraksiz golni, so‘ngra esa kutilmaganda uchinchi golni ham o‘tkazib yubordik. Uchchala golni ham standart vaziyatlardan olib chiqolmadik. Raqib asosan ikkinchi qavatda yaxshi ustunlikka ega ekanligi va muayan futbolchilarni individual ravishda nazorat qilish lozimligini futbolchilarimga ta’kidlagan edim.

Aynan shu kabi vaziyatlarni shogirdlarim bilan tanaffus davoimda ham alohida muhokama qilib o‘rganib chiqqandik. Afsuski, shogirdlarim ikkinchi bo‘limda, murabbiylarning ko‘rsatmalarini bajara olishmadi va natija, ko‘rib turganingizdek.

Bundan tashqari, natijaga raqibning “feyr pley”ga umuman amal qilmaganligi ham katta ta’sir ko‘rsatdi. Futbolchilarim esa o‘z o‘rnida, yutib turganimizga qaramay vaqtni cho‘zmadilar, aksincha hujumlarimizni tezroq boshlab to‘pni maydonda yurishini ta’minlashga harakat qilishdi.

Obid Jo‘raboyevning holati bo‘yicha hozircha bir nima deya olmayman. Sababi yigitlar simulyasiya ishlatmagani aniq. Agar bunaqa bo‘lganida, Jo‘raboyevni shifoxonaga olib ketishmagan bo‘lardi va uning jarohatining darajasi to‘g‘risida tibbiy hulosalar qaydnomaga kiritilmagan bo‘lardi deb hisoblayman.

Umuman olganda, o‘yin natijasidan qoniqmadim. Biz g‘alabaga loyiq o‘yin namoyish etdik. Shunday bo‘lsada, ushbu holatni unutib keyingi uchrashuvlarga tayyorgarlik ko‘ramiz va xatolarimiz ustida ishlashda davom etamiz.