“Sion” futbol jamoasi rahbari Kristian Konstantin va uning o‘g‘li tomonidan sport sharhlovchisining kaltaklanishi tasvirlangan videolavha internetda shov-shuvga sabab bo‘ldi. Bu haqida Russian Today​ telekanali xabar bermoqda.

Ma’lum bo‘lishicha, payshanba kuni “Lugano” jamoasiga qarshi safardagi o‘yinda g‘alabaga erishgandan so‘ng, “Sion” prezidenti Kristian Konstantin tomoshabinlar ko‘z o‘ngida Rolf Fringer ismli jurnalistga hujum qilgan. Konstantin tomonidan jurnalistning urib yiqitilishi va yiqilgan sharhlovchi kaltaklanishini kameralar suratga olgan.

“Sion”ning egasi jurnalistni yiqitgandan so‘ng ham tepkilashda davom etgan va unga qarshi bir necha bor zarba bergan. Jurnalistning aytishicha, klub rahbari bilan qarama-qarshilik “Lugano”ga qarshi o‘yin davom etayotgan vaqtdayoq boshlangan. Prezidentning o‘g‘li jurnalistga hujum qilgani kameralar tomonidan suratga olinmagan. O‘yindan tugagandan so‘ng, klub prezidenti o‘g‘lining ishini «davom ettirib» qo‘ygan.

Janjalga sport sharhlovchisi tomonidan yozilgan tanqidiy maqola sabab bo‘lgani aytilmoqda. Ma’lum bo‘lishicha, Rolf Fringer o‘z maqolasida “Sion” prezidentini keskin tanqid ostiga olgan va uni xudbinlikda ayblagan. O‘z qilmishiga izoh berar ekan, Konstantin jurnalist o‘z maqolasida uni haqorat qilgani va buning uchun unga dars berib qo‘yishga ahd qilganini aytgan. Prezident 60 yoshli jurnalistni kaltaklagach, o‘zini yaxshi his qila boshlaganini ham qo‘shimcha qilgan.

Ma’lumot uchun, hozirda televideniyeda sport sharhlovchisi sifatida ishlayotgan Rolf Fringer 1990-2012 yillar davomida murabbiylik faoliyati bilan shug‘ullangan. Avstriyalik sobiq murabbiy 1996-1997 yillarda Shveysariya terma jamoasini ham boshqargan. U bilan tengdosh bo‘lgan Kristian Konstantin esa 2003 yildan beri “Sion” jamoasiga egalik qiladi. Uning boshqaruv davrida jamoa 4 marta Shveysariya kubogini qo‘lga kiritgan.