“Сион” футбол жамоаси раҳбари Кристиан Константин ва унинг ўғли томонидан спорт шарҳловчисининг калтакланиши тасвирланган видеолавҳа интернетда шов-шувга сабаб бўлди. Бу ҳақида Russian Today​ телеканали хабар бермоқда.

Маълум бўлишича, пайшанба куни “Лугано” жамоасига қарши сафардаги ўйинда ғалабага эришгандан сўнг, “Сион” президенти Кристиан Константин томошабинлар кўз ўнгида Рольф Фрингер исмли журналистга ҳужум қилган. Константин томонидан журналистнинг уриб йиқитилиши ва йиқилган шарҳловчи калтакланишини камералар суратга олган.

“Сион”нинг эгаси журналистни йиқитгандан сўнг ҳам тепкилашда давом этган ва унга қарши бир неча бор зарба берган. Журналистнинг айтишича, клуб раҳбари билан қарама-қаршилик “Лугано”га қарши ўйин давом этаётган вақтдаёқ бошланган. Президентнинг ўғли журналистга ҳужум қилгани камералар томонидан суратга олинмаган. Ўйиндан тугагандан сўнг, клуб президенти ўғлининг ишини «давом эттириб» қўйган.

Жанжалга спорт шарҳловчиси томонидан ёзилган танқидий мақола сабаб бўлгани айтилмоқда. Маълум бўлишича, Рольф Фрингер ўз мақоласида “Сион” президентини кескин танқид остига олган ва уни худбинликда айблаган. Ўз қилмишига изоҳ берар экан, Константин журналист ўз мақоласида уни ҳақорат қилгани ва бунинг учун унга дарс бериб қўйишга аҳд қилганини айтган. Президент 60 ёшли журналистни калтаклагач, ўзини яхши ҳис қила бошлаганини ҳам қўшимча қилган.

Маълумот учун, ҳозирда телевидениеда спорт шарҳловчиси сифатида ишлаётган Рольф Фрингер 1990-2012 йиллар давомида мураббийлик фаолияти билан шуғулланган. Австриялик собиқ мураббий 1996-1997 йилларда Швейцария терма жамоасини ҳам бошқарган. У билан тенгдош бўлган Кристиан Константин эса 2003 йилдан бери “Сион” жамоасига эгалик қилади. Унинг бошқарув даврида жамоа 4 марта Швейцария кубогини қўлга киритган.