Oliy liganing 23-turining markaziy uchrashuvlaridan biri Namanganda bo‘lib o‘tadi.

1 oktyabr kuni «Navbahor» o‘z uyida «Paxtakor»ni qabul qiladi.

Oliy liganing ikkinchi davrasi har ikki jamoa uchun ham yaxshi o‘tmoqda. Arveladze jamoasi qator g‘alabalardan so‘ng kuchli uchlikka kirishga erishgan bo‘lsa, Mo‘minjonov jamoasi o‘z o‘rnini mustahkamlab bormoqda.

Aytish kerakki, «Navbahor» bu raqibini 5 yildan beri Namanganda mag‘lub eta olmayapti. Jamoamiz o‘z maydonidagi so‘nggi besh uchrashuvning 4 tasida «Paxtakor»ga mag‘lub bo‘lgan. 

So‘nggi bor «Navbahor» 2011 yilda rahmatli Aleksandr Shadrinning dubli evaziga Kosonsoyda poytaxtliklardan ustun kelgandi.

Yana bir qiziq ma’lumot. «Paxtakor» jamoasi Namanganda o‘zaro o‘yinlarda «Navbahor»dan ko‘p g‘alaba qozongan. "Navbahor” o‘z uyida 25 ta uchrashuvdan 10 tasida bu raqibni mag‘lub etgan bo‘lsa, "sherlar”  Namangandan 11 bor g‘olib bo‘lib qaytgan. Qolgan 4ta uchrashuvda durang qayd etilgan.

Namanganda o‘tgan so‘nggi besh o‘yin:

24.09.2016 «Navbahor» - «Paxtakor» 1:5
20.09.2015 «Navbahor» - «Paxtakor» 0:1
02.10.2014 «Navbahor» - «Paxtakor» 0:1
08.11.2013 «Navbahor» - «Paxtakor» 2:2
18.08.2012 «Navbahor» - «Paxtakor» 0:1