Олий лиганинг 23-турининг марказий учрашувларидан бири Наманганда бўлиб ўтади.
1 октябрь куни «Навбаҳор» ўз уйида «Пахтакор»ни қабул қилади.
Олий лиганинг иккинчи давраси ҳар икки жамоа учун ҳам яхши ўтмоқда. Арвеладзе жамоаси қатор ғалабалардан сўнг кучли учликка киришга эришган бўлса, Мўминжонов жамоаси ўз ўрнини мустаҳкамлаб бормоқда.
Айтиш керакки, «Навбаҳор» бу рақибини 5 йилдан бери Наманганда мағлуб эта олмаяпти. Жамоамиз ўз майдонидаги сўнгги беш учрашувнинг 4 тасида «Пахтакор»га мағлуб бўлган.
Сўнгги бор «Навбаҳор» 2011 йилда раҳматли Александр Шадриннинг дубли эвазига Косонсойда пойтахтликлардан устун келганди.
Яна бир қизиқ маълумот. «Пахтакор» жамоаси Наманганда ўзаро ўйинларда «Навбаҳор»дан кўп ғалаба қозонган. "Навбаҳор” ўз уйида 25 та учрашувдан 10 тасида бу рақибни мағлуб этган бўлса, "шерлар” Намангандан 11 бор ғолиб бўлиб қайтган. Қолган 4та учрашувда дуранг қайд этилган.
Наманганда ўтган сўнгги беш ўйин:
24.09.2016 «Навбаҳор» - «Пахтакор» 1:5
20.09.2015 «Навбаҳор» - «Пахтакор» 0:1
02.10.2014 «Навбаҳор» - «Пахтакор» 0:1
08.11.2013 «Навбаҳор» - «Пахтакор» 2:2
18.08.2012 «Навбаҳор» - «Пахтакор» 0:1
