Bugun, 27 sentyabr kuni O‘zbekiston futbol federasiyasining yangi rahbariyati bilan ilk marta matbuot anjumani tashkil qilindi.
Unda tashkilot rahbari Umid Ahmadjonov, vise-prezidentlar — Isroilov, MOQ bosh kotibi Oybek Qosimov, Ijroqo‘m a’zolari — Rustam Qurbonov va Murod Aliyev ishtirok etishdi.
O‘FF rahbari Umid Ahmadjonov jurnalistlarning savollariga javob qaytardi.
- Kelishilgan o‘yinlar futbolning ildiziga bolta uradi. Bu borada jiddiy kurash olib borish kerakdir?
— O‘FF futbol federasiyasi tarkibida 3 nafar xavfsizlik xodimlari faoliyat olib boradi. Ular organ tizimida ishlagan sobiq xodimlari hisoblanadi. Har bitta o‘yin va uchrashuvni boshqarib boradigan hakamlarning faoliyati o‘rganiladi. Kelishilgan o‘yinlarga qarshi kurashni yangi darajaga olib chiqamiz.
— Milliy terma jamoa bosh murabbiyi kim bo‘ladi va nomzod qanday tamoyil asosida tanlab olinadi?
— Terma jamoa bosh murabbiyiga nomzodlar bilan muzokaralar olib borilmoqda. Muzokaralar qoidasiga ko‘ra, nomzodlar nomini e’lon qila olmayman. Muzokaralar yakuniga yetganidan keyin rasman e’lon qilamiz.O‘zbek futboliga mos keladigan murabbiyni izlamoqdamiz. Yangi murabbiy masalasini 15-20 kun ichida e’lon qilsak kerak.
— Oliy ligani rivojlantirish uchun O‘zPFLga yangi rahbariyat kerak. Eski rahbarlar bilan natijaga erishib bo‘lmaydi. Masalan, Asqar Tolibjonov va Farhod Magometov o‘z lavozimlarida qoladimi?
— O‘zPFLning tashkiliy tuzilmasi qayta ko‘rib chiqilyapti. Tashkilotga yangi mutaxassislar jalb qilinyapti. PFLni kuchaytirish uchun xorijning yetakchi PFLlarini faoliyatini o‘rganib chiqyapmiz. Shuningdek, O‘zPFL va O‘FF vakillarini "Real" va "Barselona" klublariga tajriba oshirish uchun yuborishni rejalashtiryapman. Bitta narsani ochiq aytaman, Federasiyada hozir ishlayotgan 90 foiz mutaxassislar o‘z lavozimida qolmaydi. Yangi mutaxassislar tanlov asosida qabul qilinadi. Bu haqda 2-3 kunda e’lon beramiz.
