"Navbahor" Oliy liganing navbatdagi turidan o‘rin olgan "Paxtakor"ga qarshi uchrashuvga tayyorgarlikni davom ettirmoqda.
Bugun murabbiylar mashg‘ulotlarda qatnashayotgan futbolchilardan ikki tarkib hosil qilgan holda nazorat o‘yinini o‘tkazishdi. Har bir bo‘limi 30 daqiqadan iborat bo‘lgan bahsda sariq libosda harakat qilgan jamoa "ko‘klar"ni 2:1 hisobida mag‘lub etdi.
Birinchi bo‘limda Ro‘zimboy Ahmedov ikki bor muvaffaqiyat qozondi. Dastlab Ahmedov darvozabon qaytargan to‘pni to‘rga tushirgan bo‘lsa, ikkinchi vaziyatda burchak to‘pi amalga oshirilgach aniq zarba yo‘lladi. Nemanya Yovanovich ikkinchi bo‘limda penaltini aniq amalga oshirib, yagona javob goliga mualliflik qildi.
Jamoalar tarkibi quyidagicha bo‘ldi.
"Sariqlar": Mirzohid Mamatxonov, Mirzohid G‘ofurov, Ayubxon Gapparov, Hojiakbar Yunusov, Abbos Otaxonov, Dilshod Jabborov, Oston O‘runov, Abbos Maxstaliyev, Azizbek Turg‘unboyev (Abbos G‘ulomov), Ravshan Xursanov, Ro‘zimboy Ahmedov.
"Ko‘klar": Dilshod Hamroyev, Ilhom Boydedayev, Jahongir Mehmonov, Yunusbek Abduvohidov, Shahzod Hamidov, A’zam Aliyev, Murod Rajabov, Said Abdujabborov, Doniyor Usmonov, Oybek Qilichev, Nemanya Yovanovich.
