"Bavariya"dan iste’foga chiqarilgan Karlo Anchelotti Yevropa chempionlar ligasi doirasida "PSJ"ga qarshi o‘yinda g‘alati tarkibni tanlagandi. Italiyalik mutaxassis jamoaning bir nechta yetakchi futbolchilariga boshlang‘ich tarkibdan joy bermadi.

O‘yindan oldin Anchelotti 11 nafar futbolchining nomini e’lon qilgan va shundan so‘ng hech narsa demasdan kiyinish xonasini tark etgan. Ko‘p futbolchilar murabbiyning ushbu qaroridan shokka tushishgan va g‘azablanishgan. Bu haqda Germaniyaning Sport1 telekanali xabar tarqatdi.

Avvalroq Jerom Boateng "PSJ"ga qarshi o‘yinda zaxiraga kiritilishi haqida aytilgandi, ammo u qaydnomadan o‘rin olmadi. Anchelotti unga ham hech qanday izoh bermagan.

Futbolchilar va rahbariyatning taxminicha, shunday yo‘l bilan mutaxassis barchaning asabiga o‘ynamoqchi bo‘lgan. O‘yindan oldin jamoadagi muhit yaxshi bo‘lmagan.

O‘yinchilar Anchelottining mashg‘ulot jarayonidan qoniqish hosil qilmagan. Uning uslubi top-jamoalarga mos emas deb hisoblandi. Jamoa rahbariyati zudlik bilan chora ko‘rishi kerak edi va Parijdayoq murabbiyni iste’foga chiqarish borasida qaror qabul qilingan.

Anchelotti bilan ishlash «Bavariya»ning besh nafar futbolchisining «hiqildog‘iga kelgandi». Ular: Riberi, Robben, Boateng, Xummels va Myuller.