"Бавария"дан истеъфога чиқарилган Карло Анчелотти Европа чемпионлар лигаси доирасида "ПСЖ"га қарши ўйинда ғалати таркибни танлаганди. Италиялик мутахассис жамоанинг бир нечта етакчи футболчиларига бошланғич таркибдан жой бермади.

Ўйиндан олдин Анчелотти 11 нафар футболчининг номини эълон қилган ва шундан сўнг ҳеч нарса демасдан кийиниш хонасини тарк этган. Кўп футболчилар мураббийнинг ушбу қароридан шокка тушишган ва ғазабланишган. Бу ҳақда Германиянинг Sport1 телеканали хабар тарқатди.

Аввалроқ Жером Боатенг "ПСЖ"га қарши ўйинда захирага киритилиши ҳақида айтилганди, аммо у қайдномадан ўрин олмади. Анчелотти унга ҳам ҳеч қандай изоҳ бермаган.

Футболчилар ва раҳбариятнинг тахминича, шундай йўл билан мутахассис барчанинг асабига ўйнамоқчи бўлган. Ўйиндан олдин жамоадаги муҳит яхши бўлмаган.

Ўйинчилар Анчелоттининг машғулот жараёнидан қониқиш ҳосил қилмаган. Унинг услуби топ-жамоаларга мос эмас деб ҳисобланди. Жамоа раҳбарияти зудлик билан чора кўриши керак эди ва Париждаёқ мураббийни истеъфога чиқариш борасида қарор қабул қилинган.

Анчелотти билан ишлаш «Бавария»нинг беш нафар футболчисининг «ҳиқилдоғига келганди». Улар: Рибери, Роббен, Боатенг, Хуммельс ва Мюллер.