Kolumbiyalik mashhur honanda Maluma 2018 yil Rossiyada o‘tadigan futbol bo‘yicha jahon chempionati madhiyasini kuylaydi. Bu haqda “Eurosport” nashri xabar bermoqda.

Ma’lumotlarga ko‘ra, kolumbiyalik qo‘shiqchi halqaro futbol federasiya (FIFA) tashkilotining bu boradaga taklifiga rozilik bergan va madhiyani tayyorlash ishlarini hozirdan boshlab yuborgan. Jahon chempionati rasmiy madhiyasini kuylaydigan qo‘shiqchini aynan FIFA rasmiylari tanlashadi.

Madhiya joriy yilning dekabr oyida taqdim etilishi rejalashtirgan bo‘lib, 23 yoshli qo‘shiqchi rasmiy musobaqa madhiyasini tayyorlashda 24 nafar musiqachi yordamidan foydalanadi. Shuningdek, madhiya ijrosida Malumadan tashqari puertorikolik qo‘shiqchi Bed Banni ham ishtirok etishi mumkin.

Ma’lumot uchun, Maluma “El Perdedor” qo‘shig‘i orqali butun dunyoda mashhur bo‘lib, ushbu qo‘shiqni Youtube videotarmog‘ida 1 milliondan ortiqroq internet foydalanuvchilari tomosha qilishgan.

Shuningdek, Maluma jahon chempionati madhiyasini ijro etgan ikkinchi kolumbiyalik qo‘shiqchiga aylanadi. Bundan 7 yil avval yana bir kolumbiyalik honanda Shakira 2010 yil JAR mamlakatida o‘tgan mundial madhiyasi (“Waka Waka”) ni kuylagandi.

JCH–2018 final bosqichi 2018 yilning 14 iyun kunidan 15 iyul kuniga qadar Rossiyada o‘tkaziladi.

Eslatib o‘tamiz, “Manchester Siti” klubi va Argentina terma jamoasi hujumchisi Serxio Aguero yaqinda Malumaning Amsterdamdagi konsertini tomosha qilish uchun tashrif buyurib, aeroportga qaytayotgan vaqtida yo‘l-transport hodisasiga uchragandi. Taxminlarga qaraganda, futbolchining jarohati tuzalib ketishi uchun 6 hafta kerak bo‘ladi.