FIFA agenti Vladimir Abramov Rossiya terma jamoasining navbatdagi o‘rtoqlik o‘yinidagi raqibi Janubiy Koreya haqida o‘z fikrlarini aytdi.
Ma’lumki, koreyaliklar JCH-2018 saralash guruhida Erondan keyin 2-o‘rinni egallagan edi.
"Janubiy Koreya jahon chempionati yo‘llanmasini katta qiyinchilik bilan qo‘lga kiritdi. O‘zbeklarda imkoniyat bor edi, agar ular g‘alaba qozonganida, Janubiy Koreya yo‘llanmasiz qolardi. 2-o‘rin bilan jahon chempionatiga chiqish - koreyaliklar uchun sharmandalik!
Ularda murabbiylar bilan bog‘liq muammolar ham yuzaga keldi. Nemis murabbiyini ishdan olishdi. Mahalliy murabbiyni tayinlab, endi undan ham norozi bo‘lishyapti. Umuman olganda, saralash turniri oxirida ularda murabbiy va tarkib bo‘yicha muammo paydo bo‘laveradi.
O‘zbekistonga qarshi o‘yinda yevropalik legionerlarning o‘yini hafsalani pir qildi. Ular go‘yo bir joyda turib qolgandek edi. Sababi? O‘zbekistonda iqlim boshqacha, havo issiq. Yevropadan kelganlar uchun bu og‘ir" - dedi Abramov.
