O‘zbekistonning amaldagi chempioni hamda mamlakat kubogi sohibi – Toshkentning “Lokomotiv” klubi bugun kubok bahslari yarimfinal javob o‘yinlari doirasida Qarshida “Nasaf” mehmoni bo‘ladi.

Yodingizda bo‘lsa, ushbu jamoalarning dastlabki uchrashuvi Toshkentda o‘tgandi va unda “Loko” vakillari 3:1 hisobida g‘alaba qozonib, javob o‘yini oldidan finalga chiqish uchun yaxshigina imkoniyat xosil qilishgandi.

Bugun esa jamoalar final yo‘llanmasini uzil-kesil hal etish uchun Qarshidagi “Markaziy” o‘yingohida bahs yuritishadi. O‘yin soat 18:00da start olishi rejalashtirilgan.

Qayd etish joizki, yurtmizning ushbu ikki grand jamoalari shu paytga qadar mamlakat kubogi bahslari doirasida 2 bor o‘zaro to‘qnash kelishgan. Dastlab, ushbu jamoalarning yo‘llari 2015 yilgi kubok o‘yinlarining yarimfinalida kesishgan. O‘shanda ilk bahsda “Nasaf” 2:0 hisobida zafar quchgan. Javob bellashuvida esa “Lokomotiv” vakillari 1:0 hisobida g‘alabaga erishishgan. Shu tariqa, finalga qarshiliklar yo‘l olgandi.

O‘tgan yili esa mazkur jamoalar O‘zbekiston kubogining hal qiluvchi – final bahsida o‘zaro bellashishgan. Samarqandda kechgan matchda “Lokomotiv” 1:0 hisobida g‘alaba qozonib o‘z tarixida ikkinchi marta billur sovringa ega chiqdi.