Kecha Afrika qit’asida bo‘lib o‘tgan JCH-2018 saralash bahslarining birida mojaro kelib chiqdi. Uganda va Gana terma jamoalari o‘rtasidagi uchrashuvning qo‘shimcha daqiqalari yakunlanayotgan paytda mehmonlar gol urishga muvaffaq bo‘lishdi. Ammo hakamlar bu golni inobatga olishmadi.

Ganalik futbolchi olis masofadan darvoza tomon zarba berdi. Darvozabon qaytargan to‘pni hujumchi darvozaga joylab qo‘ydi. Laynsmen darhol bayroqchasini ko‘tarib, qo‘pol xatoga yo‘l qo‘ydi. Boisi, zarba berilayotgan paytda hujumchi ofsayd holatida emasdi.

Gana futbol federasiyasi FIFAga murojaat yo‘llab, mazkur o‘yinni qaytadan o‘tkazishni so‘radi. Uchrashuvni JARlik hakam Deniel Bennet boshqarib borgandi.

Mazkur durangdan keyin Gana terma jamoasi JCH-2018 yo‘llanmasidan deyarli mahrum bo‘ldi. Jamoa 5ta o‘yindan keyin 6 ochkoga ega bo‘lib turibdi. Uganda hisobida esa 8 ochko bor. Hozirda 9 ochko bilan guruh peshqadami bo‘lib turgan Misr 5-tur bahsini bugun Kongoga qarshi o‘tkazadi. Ushbu o‘yindagi g‘alaba misrliklarga muddatidan avval JCH-2018 yo‘llanmasini taqdim etadi.

E’tiborli tomoni shundaki, Misr bugun g‘alaba qozonsa, Uganda-Gana uchrashuvini qayta o‘tkazish ko‘proq ugandaliklarga naf berishi mumkin. Boisi, misrliklar Kongoni mag‘lub etishsa, Gana har qanday holatda ham Mundial yo‘llanmasidan mahrum bo‘lishadi. Takroriy o‘yin o‘tkazilsayu, Uganda Ganani mag‘lubiyatga uchratsa, so‘nggi tur oldidan Rossiya-2018 yo‘llanmasi uchun imkoniyatni saqlab qoladi.

Eslatib o‘tamiz, avvalroq FIFA JCH-2018 saralash bosqichi doirasida JAR – Burkina-Faso bahsini qayta o‘tkazish haqida qaror chiqargandi.