O‘zbekistonning U-19 ayollar terma jamoasi futbol buyicha Osiyo chempionatida ishtirok etish uchun Xitoyning Nankin shahriga yetib keldi.

Avval xabar berganimizdek, vakillarimiz “A” guruhidan joy olishgan hamda guruhdan chiqish uchun Xitoy, KXDR va Tailand terma jamoalariga karshi baxs olib borishadi.

Nankin shahri yomg‘irli havo bilan terma jamoamiz a’zolarini qarshi oldi. Ammo, bu holat delegasiyamiz a’zolari kayfiyatiga salbiy ta’sir qilgani yo‘q. Terma jamoamizda ichki muhit ajoyib tarzda shakllangan, barcha murabbiylar va futbolchilar yuqori natijalar uchun kurashishga tayyor.

Terma jamoamiz istiqomat kilishi uchun Nankindagi sportchilarga mo‘ljallangan maxsus Tyan Yun bo‘yidagi Olimpiya shaharchasidan joy ajratildi. Bu yerda turli jismoniy mashqlar o‘tkazish hamda mashg‘ulotlardan keyin tiklanish uchun barcha sharoitlar muxayyo qilingan.

Bahrom Norsafarov boshchiligidagi terma jamoamiz murabbiylar shtabi maxsus mashg‘ulotlar jadvalini ishlab chiqishgan va ushbu rejaga ko‘ra bugun futbolchi qizlarimiz Nankin shahridagi dastlabki mashg‘ulotni o‘tkazishadi.

Osiyo chempionati doirasidagi guruhdagi dastlabki bahs 15 oktyabr yakshanba kuni Xitoy terma jamoasiga qarshi o‘tkaziladi.