Madridning “Real” klubi hamda Portugaliya terma jamoasi himoyachisi Krishtianu Ronaldu qon plazmasi donoriga aylandi. Bu haqda futbolchining o‘zi Instagram tarmog‘idagi sahifasi orqali e’lon qildi.
 
Ronaldu so‘nggi yillarda “Abbott” tibbiyot kompaniyasining “BeThe1Donor” dasturi a’zosiga aylangandi. Mazkur dastur butun dunyoda qon va qon plazmasi donorlari harakatini birlashtirgan bo‘lib, Ronaldu ham donorlar tarkibiga kirganini o‘zining surati orqali tasdiqladi.
 
“Motivasiya! Qo‘limdagi qon plazmasi to‘ldirilgan paketga butun dunyoda muhtojlar soni qanchaligini yaxshi bilaman. Ular qon plazmasiga muhtojdirlar, “mehringizni” muhtoj odamlarga ulashing va imkoniyat borligida bir-biringizga yordam qo‘lini cho‘zing!”, deya yozadi Krishtianu Ronaldu.
 
Qon plazmasi — qizil qon hujayralari, ya’ni eritrositlar hamda oq qon hujayralari, ya’ni leykositlardan xoli qilingan sarg‘ish suyuqlik bo‘lib, umumiy qon hajmining 55 foizini o‘z tarkibida saqlay oladi.
 
Shuningdek, plazma qon quyish vaqtida qon hajmini qayta tiklash, shuningdek, o‘zining xususiyatlariga ko‘ra boshqa “yordamchi suyuqlik” vazifalarini o‘taydi.
 
Ronaldu “BeThe1Donor” dasturiga sobiq jamoadoshining bemor o‘g‘li va qolgan muhtojlarga yordam berish uchun jiddiy bel bog‘lagan. 32 yoshli futbolchi bir yilda ikki marta qon topshiradi va qolganlarni ham shu ishni hech bo‘lmasa bir yilda amalga oshirishga chorlab qoldi.
 
Eslatib o‘tamiz, avvalroq Krishtianu Ronaldu 2013 yilda qo‘lga kiritgan “Oltin to‘p”ini auksionda 600 ming yevroga sotib, savdodan kelgan barcha pulni butun dunyodagi ahvoli og‘ir, xasta bolalarning sog‘ayib ketishi uchun yo‘naltirgandi.
 
Shuningdek, “Oltin to‘p” sovrining to‘rt karra sohibi bir necha yildan buyon yurak raki xastaligidan aziyat chekayotgan polshalik Oliver Plusiyennikning bir umrlik homiysiga aylangani haqida ham xabar bergandik.   Akmalxon Eshonxonov