Toshkent xokkey klubi yaqin ikki mavsum ichida Kontinental xokkey ligasida (KXL) paydo bo‘lishi mumkin.

Agentlik manbasining aytishicha, liga safini kelasi mavsum yoki 2019/20 mavsumda Toshkent jamoasi to‘ldirishi mumkin. Ayni paytda O‘zbekiston poytaxtida 12 ming tomoshabinga mo‘ljallangan "Humo Arena" muz saroyi qurilmoqda. Saroy qurilishi 2018 yil kuzida yakunlanishi mo‘ljallangan.

"Humo Arena" ochilganidan so‘ng "Binokor" klubi KXL chempionatida uy uchrashuvlarini o‘tkazishi rejalashtirilmoqda. Klubning liga tarkibiga kirishi bevosita saroyning foydalanishga topshirilish muddatiga bog‘liq. Klub KXLning hamkorlaridan biri bo‘lgan xalqaro ERIELL neft-servis guruhi tomonidan moliyalashtirilishi mumkin. ERIELL O‘zbekistonda faol ish olib boradi va uning egalari KXLda o‘zbek klubi paydo bo‘lishiga qiziqish bildirmoqda.

Hozirda KXLda yetti mamlakat – Rossiya, Belorussiya, Qozog‘iston, Latviya, Xitoy, Finlyandiya va Slovakiyadan 27 klub qatnashadi.

Xabar qilinishicha, Xalqaro xokkey federasiyasi (IIHF) kongressida "Humo Arena" taqdimoti bo‘lib o‘tgan. Taqdimotda O‘zbekiston vakillari saroy ochilishiga bag‘ishlab IIHF shafeligi ostida xokkey turniri o‘tkazish tashabbusi bilan chiqishgan.