“Neftchi” – “Nasaf” uchrashuvi yakuniga yetgach, jamoamiz ustozi Ro‘ziqul Berdiyev jurnalistlar bilan o‘yin haqidagi fikrlari bilan o‘rtoqlashdi.

-Uchrashuvda uchta to‘p farqi bilan g‘alabaga erishdik, ammo bu biz uchun oson bo‘lgani yo‘q. Chunki, “Neftchi” jamoasi ham yaxshigina golli vaziyatlarga ega bo‘lishdi. Agar o‘sha vaziyatlarni golga aylantirishganda, hisob boshqacha ham bo‘lishi mumkin edi. Bugun qaysidir ma’noda omad biz tomonda bo‘ldi, shuni evaziga g‘alaba qozondik. “Neftchi” jamoasida umidli va iqtidorli yosh futbolchilarni ko‘rdik. Ular ham bugun yaxshi o‘yin namoyish etishdi.

Legionerlarni tanlashda nimaga e’tibor beramiz? Albatta legioner tanlash juda og‘ir masala. Bizning chempionatimizga saviyali legionerlar kerak. Biz ko‘p vaqt tanlagan o‘yinchimizni kuzatamiz, murabbiylarimiz bilan birga bu futbolchini o‘yinlarini ko‘rib chiqamiz, statistikasini o‘rganamiz, o‘yinchining maydondagi harakatlarini  muhokama qilamiz va keyin qaror qabul qilib, muzokara qilamiz. Biz bir jihatga ko‘proq e’tibor beramizki, ya’ni tanlagan o‘yinchimiz jamoamiz o‘yiniga mos tushishi kerak. Odatda bunday futbolchini jamoamizga jalb qilganimizda, u tezda jamoaga qo‘shilib ketadi.

Jamomizni tark etgan o‘yinchilarning o‘rnini to‘ldirishda, ko‘proq o‘zimizni yoshlarga e’tibor qaratayapmiz. Bu klubimizning ustuvor yo‘nalishi va siyosati hisoblanadi. Bunda faqat men emas boshqa murabbiylar ham ko‘p mehnat qilishayapti. Oqibatda jamoamiz barqaror holda faoliyat yuritayapti.