«Napoli» Maurisio Sarri YECHL doirasida bo‘lib o‘tgan «Manchester Siti»ga qarshi o‘yin (1:2) borasida o‘z fikrlarini bildirib o‘tdi.

«Dastlabki 30 daqiqada bizga nima bo‘lganini tushunmadim. Raqibga haddan tashqari ko‘p bo‘sh hudud taqdim etdik. Qolgan vaqt davomida ancha yaxshi o‘ynadik va "Manchester Siti" bilan bir xil darajada bo‘ldik. Birinchi bo‘limda foydalanilmagan penalti bizga og‘ir botdi. Ammo biz ruhan tiklanib oldik va ikkinchi bo‘limni ajoyib tarzda o‘tkazdik.

Bizning o‘rnimizda ko‘p jamoalar "Siti"ga munosib qarshilik ko‘rsata olmagan bo‘lardi. Biz raqibga ko‘p muammolar yaratdik. Umuman olganda, biz 4ta golga tortadigan vaziyat yaratgan bo‘lsak, «Siti» 5ta imkoniyatga ega bo‘ldi. Demak, biz bu yerga hujumkor o‘yin ko‘rsatish uchun kelganimizni isbotladik. «Manchester Siti» — musobaqada g‘olib chiqish uchun asosiy da’vogar. Ular tezkor, taktik jihatdan bexato o‘ynaydi, jismoniy va ruhiy jihatdan kuchli. Agar ular o‘z darajalarini saqlab qolishsa, turnir oxiriga qadar yetib borishadi», — dedi Sarri.