Polsha milliy jamoasi JCH-2018 saralashini muvaffaqiyatli yakunladi. Bunda kvalifikasion o‘yinlarda 16ta gol urib, o‘ziga xos rekord o‘rnatgan Robert Levandovskining xizmatlari katta, albatta.
«Bavariya»ning polshalik goleadori yaqinda ESPN.FC muxbiriga maxsus intervyu berdi. Uning fikricha, Myunxen klubi yangi bosh murabbiy qo‘l ostida mavsumni qaytadan boshlaydi.
«Bavariya» uchun mavsum qaytadan boshlanadi»
- Shaxsan siz Karlo Anchelottining «Bavariya»dagi faoliyatini qanday baholaysiz?
- Uning boshqaruvida dastlabki mavsumni munosib o‘tkazdik, saviyali futbol namoyish etdik. Xususan, bizda CHL yarim finaliga chiqish imkoniyati yetarli edi.
O‘ylaymanki, «Real»ga qarshi javob uchrashuvini jarohat tufayli o‘tkazib yubormaganimda, hammasi boshqacha rivojlanishi mumkin edi. Kim biladi, balki turnirda g‘olib chiqarmidik...?
- Mana, Anchelotti o‘rnini Xaynkes egalladi, endi jamoani nimalar kutmoqda, sizningcha?
- Bemalol aytishim mumkin - «Bavariya» uchun mavsum qaytadan boshlanadi. Ha, bizga oson bo‘lmasligi aniq, zero, mavsum davomida murabbiyning almashishi qandaydir ta’sir qiladi, baribir. Lekin ayni payt o‘zga yo‘l yo‘q - oldimizga qo‘yilgan vazifalarni talab darajasida bajarish uchun olg‘a intilishimiz shart. Hozir «Borussiya»dan 5 ochko ortda qolyapmiz (oxirgi turdan so‘ng «Bavariya» va «Borussiya» D. o‘rtasidagi ochkolar farqi 2taga tushdi). Lekin oldinda o‘yinlar hali ko‘p, demak, vaziyatni o‘nglash imkoniyati yo‘q emas. CHLdagi ishtirokimizga kelsak, «PSJ»dan qabul qilingan mag‘lubiyatni bafurja tahlil qilishimiz, xatolar ustida jiddiy ishlashimiz talab etiladi. Chunki bu turnirdagi raqiblar ancha jiddiy.
«Ovoz berish natijalari larzaga soldi»
- Rummeniggening aytishicha, «Real» safida to‘p surish orzusi yo‘lida ikki hissa ko‘p ishlayotgan ekansiz. Buni qanday izohlaysiz?
- Karl-Xayns Rummenigge aynan nimani nazarda tutgani menga ma’lum emas. Menimcha, bu masalada uning o‘ziga murojaat qilishingiz kerak. To‘g‘ri, Rummeniggening fikrlarini qaysi nashr keltirgani ham muhim. Balki uning gaplari sal boshqacha talqin qilingandir...
- O‘tgan yili «Oltin to‘p» sovrini uchun o‘tkazilgan so‘rov yakunlari masalasida tanqidiy fikr bildirgan edingiz. Nima uchun?
