Bugun Muborakda futbol ishqibozlari qiziqarli uchrashuvga guvoh bo‘lishdi. Uchrashuvdagi kiritilgan uchala gol ham 11 metrlik jarimalardan kiritildi.
Kichik voha derbisida yoshlarimiz 2:1 hisobida g‘alaba qozonishdi.
Uchrashuv teng kurashlar ostida boshlandi. Har ikkala jamoa imkon bo‘lgandan hujumlarga zo‘r berishdi. Ammo bu hujumlar samarasiz yakunlanaverdi. Birinchi bo‘limning so‘nggi daqiqasida Sardor Sa’dullayev chap qanotdan jarima maydonchasiga kirib bordi va uni mezbonlar himoyachisi yiqitdi. Uchrashuv hakami ikkilanmasdan 11 metrlik jarima nuqtasini ko‘rsatdi. Penaltini Sharof Muhitdinov aniq amalga oshirdi va jamoamizni hisobda oldinga olib chiqdi – 0:1.
Jamoalar shu hisob bilan tanaffusga chiqib ketishdi.
Ikkinchi bo‘limda o‘yin juda shiddatli tus oldi. To‘p uchun kurash ham keskin bo‘ldi. To‘xtalishlar ham ko‘p bo‘ldi. Ikkinchi bo‘limda uchrashuv hakami ham cho‘ntagidan kartochkalarini tez-tez chiqarishga majbur bo‘ldi. O‘yindagi eng qiziq voqealar oxirgi daqiqalarda sodir bo‘ldi. 82-daqiqada G‘olib G‘aybullayev mezbonlar o‘yinchisiga nisbatan, jarima maydonchamizda o‘yin qoidasini bo‘zgani uchun hakam tomonidan ikkinchi marta ogohlantirilib, maydondan chetlatildi. Bunda hakam darvozamizga 11 metrlik jarima to‘pi ham belgiladi. Penaltini Siroj Meliyev aniq amalga oshirib, oradagi hisobni tenglashtirdi – 1:1.
Bu hisob bugungi o‘yinga mosdek edi. Chunki yoshlarimiz ham, mezbonlar ham g‘alaba uchun astoydil ter to‘kishdi. Stadionga tashrif buyurgan muxlislar ular ijrosidagi ajoyib o‘yin guvohi ham bo‘lishdi.
Ammo uchrashuvning asosiy vaqtiga qo‘shib berilgan daqiqalar nihoyasiga yetib borayotgan bir paytda, “Mash’al” jamoasi o‘yinchisining qo‘polligi ular uchun qimmatga tushdi. Hakam mezbonlar darvozasiga yana bir penalti belgiladi. Jarima to‘pini yana Sharof Muhitdinov aniq bajarib, jamoamizning g‘alabasini ta’minladi – 1:2. Bu paytda uchrashuvga qo‘shib berilgan daqiqalar ham nihoyasiga yetgan edi.
Shunday qilib, yoshlarimiz kichik voha derbisida g‘alaba qozonishdi va o‘z hisoblariga uch ochkoni yozdirib qo‘yishdi.
Yoshlarimiz bugungi g‘alabadan so‘ng turnir jadvalining 5-pog‘onasiga ko‘tarilib olishdi.
Yoshlar ligasi 26-tur
“Mash’al” (Muborak) – “Nasaf” (Qarshi) 1:2 (0:1)
25.10.2017. “B.Vafoyev” stadioni. 15:30
Hakamlar: Firdavs Norsafarov (Qarshi), Zufar Eliboyev (Qarshi), Elnur Doniyorov (Qarshi), Naim Qosimov (Qarshi).
Nazoratchi: Sardor Najafaliyev (Toshkent)
Gollar: Siroj Meliyev, pen.82’-1:1 – Sharof Muhitdinov, pen.45’-0:1, pen. 90+5’-1:2.
“Mash’al”: 30.Botir Nosirov, 3.Temur Mamatov, 8.Siroj Meliyev, 9.Jamoliddin Ubaydullayev (24.Muramotsu Tomoki 58), 13.Iskandar Shodmonov (22.Abdullox Maxkamov 46), 16.SHoxjaxon Qilichev, 18.G‘olibbek Sariboyev, 13.SHokir Yuldashev, 25.Mo‘minjon Meliyev (7.SHaxzodbek Ubaydullayev 70), 26.Iskandar Shaykulov, 70.Jonibek Mirzaqulov.
Zaxira: 35.Raximjon Abduqodirov, 10.Jo‘rayev, 17.Oybek To‘rayev Davronbek, 47. Begzodjon Tursunov.
“Nasaf”: 30.Muzaffar Sharipov (s), 4.Jo‘rabek Mannonov, 6.Sirojiddin Qo‘ziyev, 7.Jahongir Qurbonboyev, 13.Muhriddin Zoirov, 14.SHarof Muhitdinov, 15.G‘olib G‘aybullayev, 22.Alijon Axmatov (33.SHoxruh Ne’matov 72), 28.Sardor Sa’dullayev, 35.Javohir Shokirov (16.Anvar Husanov 60) (32.Navro‘zjon Saidov 84), 38.Doniyorjon Narzullayev.
Zaxira: 25.SHaxzodbek Suyunov, 9.Abubakr Rizo Turdaliyev, 34.Nurbek Botirov, 96.Dadajon Mamatqulov.
