"Navbahor" - "Buxoro" bahsidan keyin o‘tkazilgan matbuot anjumanining ikkinchi qismida namanganliklar bosh murabbiyi Ilhom Mo‘minjonov ishtirok etdi.

"Alamli ikkita mag‘lubiyatdan so‘ng biz bugun g‘alaba qozonmasak bo‘lmasdi. Muxlislarimiz oldida yuzimizni yorug‘ qilishimiz talab etilardi. Qolaversa, oldimizga qo‘yilgan maqsaddan ortda qolayotganimiz sababli bugungi muvaffaqiyat suv va xavodek zarur edi.

Yigitlarga katta raxmat aytmoqchiman. Muxlislar jangovar o‘yin guvoxiga aylanishdi. O‘z maydonimizda yutqazmayotganimiz bizni xursand qilib turibdi. Namangan xalqi oldida ijobiy natijalarni qayd etishda davom etamiz.

Oybek Qilichev? Hozirda futbolchimiz 28 yoshda. Bu uning ayni kuchga to‘lgan davri. Uning harakatlari noto‘g‘ri bo‘lgani rost. Oldimizda yana to‘rtta tur qolmoqda. Shundan so‘ng O‘FFning yangi rahbariyatidan kechirim so‘rab, jazoni yengillashtirishni so‘raymiz. Qarorni ular chiqarishadi. Bugun Oybek Qilichev va G‘iyos Komilovning maydonda tushmasligi yo‘qotish bo‘ldi va bu narsa bilindi.

Rahbariyat 7-8 o‘rinlarni egallashni oldimizga vazifa etib beligalagan. Biz yanada yuqori pog‘onalar uchun harakat qilmoqdamiz. Barchasi Allohdan. Klub rahbariyati bilan maslahatlashgan holda nasib qilsa, yanagi mavsumga hozirgi tarkibni saqlab qolmoqchimiz. Eng quvonarlisi, o‘yinchilarimiz o‘yindan-o‘yinga kuchayib borishmoqda. Tarkibda raqobat bor. Futbolchilar bir-birlarini o‘rinlarini to‘ldirishayotganidan xursandman. Rahbariyat sharoitlarimizni yaratib bersa, keyingi yilda kuchlilar qatorida bo‘lish uchun intilamiz. Oldimizda turgan o‘yinlarda yetakchi jamoalar bilan o‘yin o‘tkazamiz. Barchasi o‘z qo‘limizda. O‘zbekistonda "Navbahor" va "Buxoro" muxlislari singari ishqibozlarni topib bo‘lmaydi", - dedi Mo‘minjonov.